Aizawl: Hunthar venga B.Sairengpuii (L) in, hun eng emaw chen min hlauhawma awm tawh chu tun hnai ruah sur nasa avangin a hnuai lei a che leh a, tlak mai hlauhawma a awm leh tak avangin tunah hian Aizawl District Disaster Management Authority (ADDMA) hnuaia Quick Response Team (QRT)-in an vil mek. QRT hotute hian ZALEN zawhna chhangin Hazard Safety Cell leh Zonal Officer te'n ruahmanna an siam dawn thu leh hemi zulzui hian Aizawl DC-in order a chhuah dawn niin an sawi a. Tunah hian Magistrate leh Quick Response Team member 5-in an vil reng a ni. QRT hotute chuan B.Sairengi in pathum zingah a lai chu a ding nghet tawh lo tih sawiin a sir pahnihin a la chelh mai mai niin an sawi a, in hi chim ta se a nghawng tur an hrethiam mai lo tih sawiin engineer-te pawhin an sawi lawk thei lo tih an sawi a ni. B. Sairengpuii (L) in chu nikuma thiat tura order pek a nih hnuah an thiah hmain a che leh a, hemi hnu hian thiat tura an tihna order chu sut la ni lo mah se thiah chhunzawm a la ni leh lo niin Aizawl District Disaster Management Authority hotute chuan an sawi a ni. B.Sairengpuii (L) fate chuan ZALEN zawhna chhangin nikuma thiat tura order an hmuh khan an thiah hmain lei a min leh a, hemi hnu hian a min leh an rin tawh loh avangin an thiah chhunzawm ta lo niin an sawi a. An in chu tun hnaiah a che leh tih sawiin a inhreuh deuh reng niin an sawi a, power cut vek a ni tawh tih sawiin a theih ang angin an insingsa mek niin an sawi bawk. B. Sairengi fate chuan inhnuaiah tui put a awm reng tih sawiin, “Nizanah kan inah chuan thlang lamah tlem khi a awm a, chhak lamah chuan hmuh tur a la awm lo,” tiin an sawi bawk. Geotechnical Study ti thin firm pakhat ‘Grit’ chuan B.Sairengi in hi enfiah vein tihngaihna a awm tawh loa an hriat thu leh in chu a chim a nih pawha a aia nasa a thlen zel loh nan leh thang zel thei, zau zel thei a nih avangin a himna lam ngaihtuah a tul nia an hriat thu an sawi bawk.