Aizawl February 11, 2023: Vawiin khan Thingsulthliah-I ah Horticulture Department hmalakna a din Ripening Chamber & Collection Center cum Manager Quarter hawnna hun neih a ni a. He hunah hian bialtu minister R.Lalzirliana chu khuallian niin khawl leh building thar a hawng a. AMC Mayor Lalrinenga Sailo chuan khualzahawm niin a hmanpui bawk.

Hawnna inkhawm Thingsulthliah Diakkawn Branch YMA Hall-a neih ah thusawiin R.Lalzirliana chuan Thingsulthliah tlangdung chu khaw taima, Aizawl chawmtu ni reng thin an ni, a ti a. Minister chuan mizo kuthnathawktute chu mi taima tak vek an nih thusawiin hlawhtlinna an chan zel theih nan zirchianna tha neih zel a pawimawh, a ti bawk. Khawl leh hmunhma thar te chu tangkai taka hmang turin kalkhawmte chu duhsakna a hlan a ni.

Khualzahawm Lalrinenga Sailo chuan, Mizoram sawrkarin kuthnathawktute a ngaipawimawh takzet a ni, a ti a. SEDP pawh a tawpna ni lovin, bultanna tur a nih thu leh thawktu tak tak ten tangkai taka an hman zel a beisei thu a sawi bawk.

Ripening Chamber hi Centrally Sponsored Scheme - Mission for Integrated Development of Horticulture (MIDH) hnuaia din a ni a. Collection Center cum Manager Quarter hi NABARD sum hmanga sak a ni. Hawnna inkhawmah hian Horticulture Department leh Thingsulthliah VC-1 ten inremna thuthlung ziak nghalin, Ripening Chamber hi  balhla  chingtu ten tangkai taka hman theih nan Thingsulthliah VC-1 hnenah an hlan nghal a ni.