ZALEN September 2, 2025 : Vawiin khan FCS&CA Minister B. Lalchhanzova chuan Sairang Rail Station leh Sairang Dinthar-a FCI Godown sak mek leh Supply Godown sak mek te a tlawh a, FCS&CA Dept. hotuten an tawiawm a ni.

Minister hi Sairang Rail Station-ah railway hnathawktu ten an lo dawngsawng a. Godown a tlawhnaah FCI thawktu te, CPWD engineer te leh contractor ten an lo dawngsawng bawk. Thawktute chuan Minister hi hna thawh mek te dinhmun hrilhfiahin hna kallai mekte an enpui a, Minister chuan an harsatna te ngaihthlaksakin a theih anga tanpui a tum thu a sawiin, "Kan rawn umzui reng dawn a ni," a ti.

Minister chuan "Kan ramah hmasawnna hna lian tak tak thawh a ni a, hna thenkhat chu a rei thin lutuk a, helaia hnathawhte phei chu mipui ei leh bar nghawng thil a nih avanga rawn enfiah kan ni. Kan sorkar chuan hna ṭha leh zo rang, mipui ten an chhawr thuai hi a duh ber a ni a, chuvangin kan rawn enfiah leh ṭhin ang," a ti.

Minister chuan, "Sairang leh a chhehvela hmasawnna lian tak tak inṭham mek hian a ṭha zawngin kan ram ei leh bar a nghawng ka beisei a. Chutih rualin kawng lehlamah vantlang nun a nghawng dan tur pawh inzir lawk chunga kan lo inbuatsaih a tul hle a ni," a ti a, "Hmasawnna hnathawh lian tak tak ten a ram mi tribal mipuite a nghawng dan hi Ministry of Social Justice & Empowerment (MSJE) chuan a ngaipawimawh em em a, Sairang chhehvela hmasawnna hnathawhte pawh hi kan sawrkar chuan uluk takin a enzui reng a ni," a ti bawk.