Aizawl: Rajya Sabha MP K.Vanlalvena chuan Railways lamin Bairabi a buhfai lo thleng te truck in a phurhna tur kawng an siam that duh loh vangin buhfai phur ten harsatna an tawk niin a sawi.
    Rajya Sabha MP hian vawiin khan Aijal Club ah press mite kawmin rel wagon in Bairabi a buhfai a rawn phur te truck a hlanluhna kawng tawi te chu railway lamin an siamthat loh avangin a hun takah buhfai hlanthlak theih a ni lo tih sawiin wagon a din rei avangin FCI lamin sum an chawi thin niin a sawi a. "A kawng chhia hi a tul chuan Parliament ah ka au dawn a. Buhfai phurhchhuahna tur kawng tawi te an siam duhloh hi kan tuar a ni," a ti.
    Rajya Sabha MP chuan fur laia Mizoram in office hrang a neih ve nan hmalak a tum tih sawiin fur laia buhfai ah harsatna a awmloh nan tanlak a tum tih a sawi bawk.
    FCI Regional Manager Zodinpuii chuan Mizoramah FCI in godown 6 an nei mek tih sawiin tun dinhmunah kudam hrang hrangah hian buhfai 1,02,650 quintals a awm mek tih a sawi a. FCI chuan Mizoram khawchhak lama awm te tan Khawzawl ah kudam sak leh tumin hma an la mek niin a sawi bawk.