ZALEN November 20, 2023 : Congess Party chuan Vote chhiar ni sawn chungchanga Mizo mipuite ngenna, Joint NGO leh MKHC te hialin ngenna an siam Election Commission in a ngaipawimawh duh lo a, Rajsthan Vote thlak ni Hindu te hun pawimawh anih avanga a sawn bik chu an ngai thutak hle an ti a, vote chhiar ni sawn chu an duhdan leh dinna a ni tih an thuchhuah siamah an tarlang.

Mizoram Pradesh Congress Committee chuan Mizoram inthlanpui vote chhiar ni atan Pathianni ruat a Kohhran leh NGO te ngenna ngaihpawimawh a ni lo chu Mizote sentiment ngaihpawimawhlohna lian takah an ngai a, Election Commmision of India hian Mizote rilru tihnat a pawi ti lo mai nilo in a tum lui tlat niin an ngai.

MPCC President Lalsawta chuan October ni 9 (Thawhtanni) khan Chief Election Commissioner Rajiv Kumar hnenah lehkha thawn in, “In hriat angin Pathianni hi Mizoram mipuite tan chuan ni thianghlim a ni a, Pathian tana inserh ni, Pathian biak ni atan a hman a ni. Chuvangin Mizoram-ah he ni hian Programe dang liantham hman a ni ngailo. He ni hian Congress party chauh nilo, Mizo Christian te’n vote chhiar loh nise kan duh a ni. Mizo mipuite sentiment min zah sak a, he ni hi Thawhtanni atanga Zirtawpni inkarah min sawn sak turin ka ngen a che.” tiin lehkha hi a thawn a.

Election Commmision lamin thuthar engmah an neih loh zel avangin MPCC President Lalsawta chuan November ni 13 Thawhtani vek khan Chief Electoral Officer chu lehkha thawn lehin, “A hma a ka lehkha ang khan, Mizoram Inthlanpui vote chhiar ni chungchangah i ngaihhnathiamna ka rawn dil che a, December ni 3, Pathianni hi Mizo Mipuite’n Pathian ni atan kan serh ni, Pathian kan biak ni anih avangin vote chhir ni ruat a ni hi min sawn sak turin ka ngen a che."

“Vote chhiar ni ruat a nih danah hian State danga Election a nghawng theih avangin kan hrethiam a. Election Schedule in siam angin, Vote thlak hnuhnung ber tur Telengana State chuan November ni 30 ah an thlak dawn a, Vote chhiar ni chu State 4 inthlanah hian December ni 3, Pathianni ruat a ni a. I hnena ka ngen tawh angin, Mizoram hi State lian lo tak kan nih avangin, inthlan tihfel ni atan in ruat December ni 5 hma hian, Mizoram vote chhiar ni hi December ni 4 emaw, ni 5 ah pawh sawn nise kan intihfel vek hmanin a rinawm a ni. Mizoram vote chhiar ni sawn hian engmah nghawng pawi a neih dawnloh avangin min sawn sak hram turin ka ngen nawn leh a che” tiin lehkha a thawn leh bawk a ni.