ZALEN June 19, 2026 : ZPM General Headquarters chuan vawiin khan Member of Parliement, Rajya Sabha atana K Laltluangkima thlan thar a nih lawmpuina hun leh Pathian hnena lawmthu sawina hun an hmang a, MP atana thlan thar tak K Laltluangkima'n thusawina hun a hmang.

Rajya Sabha MP thar chuan, "Pathian rorel danah a hmasaberin lawmthu ka sawi a, kan party hruaitu leh member zawng zawngte duhsakna avangin ka lawmna a sang hle a ni. Kei aia fel leh tha kan party-ah an tam teh lul nen kei ber kher min thlang hi vannei ka inti tak zet a, in support-na leh tawngtaipuina te, in thurawn te ka mamawh hle dawn a ni.

"Tun tum Rajya Sabha MP inthlan chu a hahthlak hle mai a, nasa taka chhaih buai kan ni a, Rajya Sabha MP thlan hmasak khan ZPM pawh opposition kan ni a, khatih laia rorel lai candidate kha chhaih buai lovin tluang takin inthlanna neih a nih kha. Amaherawhchu kan thil tum hi a khirh poh leh a hlawhtlinna hi a thlum ve thung a ni. Ka awm zel dan tur hi tun dinhmunah chuan la hriat theih a ni lova, MP ni mek Pu K Vanlalvena term hi July 18-ah a tawp dawn a, Pu Vena term a tawp chuan Monsoon session-in a chhunzawm ang a, chumi hunah chuan Mizoram aiawh turin Delhi lamah kan chhuk ve tawhin ka ring," a ti.

Tluangkima chuan,"Lawmpuina thu ka dawng nasa hle mai a, phone atang pawha chhan sen loh khawp message ka dawng a, ka lawm hle a ni. Lawmpuina thu ka dawn zingah hian Chief Minister Pu Lalduhoma'n, "Ka pu, Rev Liangkhaia'n Pathian rawng a lo bawl tawhna avanga a tupain malsawmna ka lo dawn phah theihna te leh, Pathian pawl tam tura min fuihna" thu min thawn hi ka sawi lang lo thei lo a ni. Lok Sabha MP Pu Richie Vanlalhmangaiha a lo awm tawh sa a, a ni kaihruaina hnuaiah Mizoram tan dik leh rinawm takin hnathawh ka tum a ni," a ti.

Lawmpuina hunah hian Minister pahnih Vanlalhlana leh PC Vanlalruata te, Lok Sabha MP Richie Vanlalhmangaiha leh Planning Board Vice Chairman Dr Kenneth Chawngliana ten lawmpuina thu an sawi a, KJ Lalbiakngheta Polling Agent in report a pe bawk. ZPM General Headquarters, ZPM Zonu, ZPM Upa pawl leh ZPM Thalai atangin lawmpuina thil pek an hlan a ni.