November 10, 2023; Assembly inthlanpui neih dawn a, Lawngtlai District, Tuichawng bial a Jarulsury Polling Station a duty tur polling party te lirthei chesual a thi 4th IR Constable Z.Lalmuanzuala chu a chhungte hnen ah Rs. Nuai15 aia tlemlo Ex Gratia pek a nih theih nan District Election Officer, Lawngtlai Joseph H. Lalramsanga chuan thuneitu sang ah a thlen fel tawh.

November 5, 2023 Pathianni khan Lawngtlai atanga hmun hla zual a duty tur polling party chhuak zingah Jarulsury polling party te phurtu Maxicab MZ 07/2427 chu Chawngte piah Udalthana-I atanga Km 6 vel ah chesualin, venhimhna thawktu Constable Z. Lalmuanzuala chu a hmun ah a thi a, November 6 khan District Hospital Lawngtlai ah a ruang enfiah niin, hemi ni vek hian Lawngtlai Chandmary veng thlanmualah vuiliam a ni.

Jarulsury polling party te chuanna Maxicab hi kawng chhovah a tanga, a chhunga chuangte chhukin an nawr a, an nawrchhuak mai thei lova, lirthei tawlhlet chu kawngthlang metre 90 velah liamin a hnung lama awm Z. Lalmuanzuala chu in saseng hman lovin a hnawl tel a, nunna a chanphah ta a ni.