Aizawl: Mizoram sawrkar chhinchhiah danin, January ni 27, 2023 thleng khan Mizoramah raltlan 31,508 an awm a, chung mite chhawmdawlna chuan Mizoram sawrkarin Rs. 4,14,66,000 a seng tawh.

Assembly Budget Session meka Aizawl North I bialtu MLA Vanlalhlana zawhna, Home Minister Lalchamliana’n ziaka a chhan danin raltlan 31,508 atanga 31,050-te chu Myanmar atanga lo kal an ni a. Bangladesh atanga lo kal 458 an awm bawk.

Mizoram sawrkarin Myanmar ratlan chhawmdawl nan Rs. 3,84,66,000 a pe tawh a. Bangladesh raltlante tan Rs. 30,00,000 pe tawh.

Raltlante chhawmdawl nana Mizoram sawrkarin a pek chhuah tawh zawng zawng chu Rs. 4,14,66,000 a ni a. Chung sumte chu temporary shelter sak nan te, ei leh in, tui in tur, damdawi, thawmhnaw leh mutbu leh mamawh dang lei nan te hman a ni.