ZALEN, October 05, 2025: Kum 17 hnuah India-in BWF World Junior Championship 2025 a thleng dawn a, ram 37 atanga badminton khel thiam rual intawh khawmna turah hian India aiawhin Mizo rawlthar pahnih, H. Lalthazuala leh C. Lalramsanga te an inlan ve dawn a, Mizo zinga a hmasa ber an ni dawn.

Thawhtanni atanga Inrinni thleng Suhandinata Cup tia hriat lar, team inelna khelh a ni ang a, karlehah mi mal inelna a awm zui dawn a. National Centre of Excellence, Guwahati, Assam-a khawvel pum huap inelna ngaihhlut hlawh khelh turah hian Thazuala leh Ramsanga te chuan India ai an awh dawn a ni.

Mizo rawlthar telna India team hi Seeded No. 2 niin group pariat thenah Group H-ah Hongkong China, Nepal leh Ghana te nen an awmho va, group tina a sang berten quarter final an lut ang.

Chanmari West rawlthar, Thazuala leh Durtlanga cheng, Ramsanga te hi India aiawh tur zawnna, selection trial paltlang player 25 zinga tel an ni a. Thazuala hi boy’s singles-a India aiawh tur pali zinga tel niin mixed doubles-a pair li zingah Ramsanga leh a kawppui, Taarini Suri hi an tel bawk.

India aiawh turte hi state 13-a mite niin hmarchhak state dang atanga tel phak dang an awm loh avangin Thazuala leh Ramsanga hi hmarchhak aiawh anga sawi theih an ni bawk.

Mizoram Badminton Association (MBA) chuan India aiawha khawvel huap inelna lian ber zing hmachhawn tur an player-te hi an chhuangin hriselna tha neia a theihna leh thiamna ang ngeia khel chhuak tur leh a sang thei ang ber thleng turin duhsakna an hlan tih an sawi.