Ramin thil siamchhuah a neih chhun hlut thiam hi economy chawikan nana hmanraw pawimawh tak mai a ni a, ram dang kutchhuak lakluh te chu luah lan a nih theih nan theihtawpa tan lak tlan a tul reng a ni.

All Mizoram Poultry Farmers Association (AMPFA) te chuan Mizorama ar vulh te’n harsatna an tawk mek a, Mizo ngeiin an ar vulh te chu hnam rilru pua leisak turin an ngen a. State dang atangin ar puah tur thahnem tak lakluh a nih avangin Mizo ar vulhtute chuan an ar te chu hralhna an haihchham thin niin an insawi bawk a ni. Sawrkar leh mipuiten an harsatna hi hriatpui tur leh sutkianpui a nih theih nan khawngaih na an dil bawk a ni.

Mizoram hi kan intodelh theih na turin kawng chi tinrengin hmalak a ni a, a bikin thlai leh saah intodelh kan duh a, sawrkar lam pawhin policy te pawh a duang tawh thin a, tun sawrkar thar pawhin a thar kalpui tumin hma a la mek bawk a ni.

Tunah hian ar vulh hi kan uar hle a, kan tharchhuah ngei mipui te pawhin kan eina a rei tawh a, hma kan sawn emaw tihlaiin ram pawn atanga lakluh a awm tih hriat leh chu chuan kan hnampuite a ti chhe mek tih hriatin a lungchhiat thlak ang reng hle a, kalphung dik tur niin a lang lo a. An manganna hi mipui leh sawrkarin a ngaihthlak sak tur a ni a bawk ang. Ar bakah hian kan siamchhuah sawi tur a la awm nual thei bawk ang a, nitina a nawlpuiina an lei tawh ‘packaged drinking water’ te pawh hi kan hnianghnar tan tawh viauin a hriat a, heng lo pawh hi ‘product’ dang sawi tur a la awm nualin a rinawm a ni.

Mizote’n kan siamchhuah thil te hi Mizo te vekin kan hman ve theih hi mitin duhthusam a nih a rinawm a. A vai chuan tih chi ni lo mahse thenkhat hi chu kan siamchhuah ‘market’ tichhe thei leh pawi zawk thlen thei a nih avangin pawn lam bungrua lo lut thenkhat hi chu zirchiana kan sumdawng (entrepreneurs) te’n market an chawm theih chin ti chhe lo tawk tura khap emaw khuahkhirh emaw a ngaiin a lang a. Kawngpui hun reilote a tlang loh pawha thil zawrh ti to mai duh rilru pu tam tak kan la awm avang hian ‘price control’ lam pawh vil hneh a ngai dawn a ni. Hetih lai hian ramin siam chhuah a neih te chu khawvel pum hman tir hi tunlai rilru a nih avangin hetiang rilru hi pu tura infuih nasat a pawimawh bawk ang.