Aizawl June 20, 2024 : Nimin khan Hachhek Bial Kuhva Chingtu Pawl, Vairengte leh Bilkhawthlir Kuhva Chingtu Co-operative Society-te chuan Home Minister K Sapdanga hmuin, Joint Meeting-a an thurelte an thlen. HM K.Sapdanga chuan ṭha taka lo dawngsawngin an harsatna leh an thu thlente chu theihtawpa hmalak a tum thu leh hmalak a tum dante lo hrilhin, HM hmalak tumnaah Kuhva Chingtuten lawmawm an ti hle.

Hachhek Bial, Vairengte leh Bilkhawthlir Kuhva Chingtute chuan, Ni 6.6.2024 khan Joint Committee, Vairengte-ah an nei a. An resolution pass zingah June 30, 2024 ralhma ngeia Vairengte leh a chhehvela ramdang aṭanga dan loa kuhva lakluh dahkhawmna Kudam-te thianfai turin Sorkar an ngen a. An ngennain awmzia a neih loh chuan aṭul anga hnatlang koha hmalak an tum thu an lo pass tawh a. HM chuan hmalak a tum thu leh hemi chungchang hi DC te pawh sawipui a tum thu a lo hrilh.

Mizoram Kuhva tharte Certificate of origin pek chhuah dan tur sorkarin a siam thar chu Joint Committee hian kuhva chingtute tan thil harsa leh foreign Kuhva Smuggling do na atana him tawklo leh hman chhunzawm tlaka an ngaih loh thu an thlen.

Dan loa Kuhva ro tawlh chungchanga social activist Pi Vanramchhuangi'n Gauhati High Court, Aizawl Bench a PIL a thehluh chu CBI chhuitir ngei turin ngenna an thehlut bawk.

Mizoram Police check gate-te tun aia rintlak zawka thuam turin an ngen a, Kuhva tawlhruk tihtawp a nih theih nan HM chu chak zawka hma la turin an ngen bawk.