Aizawl: National Tobacco Control Society (Mizoram), CID (Crime), Taxation Department leh Legal Metrology Department tangkawp ten May 2016 atanga beihpui an thlak kal zelah ramdang siam cigarette Rs. 32,61,810 hu an man tawh. Legal Metrology thawktute hnen atanga Zalen thudawn danin heng cigarette an man te hi Zokhawthar leh Moreh kaltlanga Mizoram ah lakluh an ni tlangpui tih an sawi a. Ramdang siam cigarette te hi Aizawl district ah packet 92801, Lunglei ah 3870, Saiha ah 804, Kolasib ah 1580, Lawngtlai ah 631, Champhai ah 7000 leh Serchhip district ah 2014, a vaiin packet 108727 an man tawh tih an sawi. Legal Metrology thawktute chuan heng ramdang siamah hian danin a phut hrang hrang a siamtu hming leh address, a generic hming, a rih zawng leh tam lam, siam hun thla leh kum, a man zat/ hralh theihna sang ber (MRP) te tarlan a nihloh bakah a hlauhawmzia tarlanna (health warning) pawh a awm lova, a awm chhun ah pawh danin a phut ang 85% a tlinloh vanga man an nih thu Zalen an hrilh. Ram dang siam cigarette kawltu an man te hi Rs. 1000 atanga Rs. 5000 thleng chawitir theih an nih bakah lungin tan tir theih an ni a, mahse tun dinhmunah chuan a hming maiin hremna hi kalpui hrih a ni. Legal Metrology ten cigarette an man te hi tihral tura buaipui mek a niin hun remchang hmasa berah incinerator a hal emaw tuia leih huh a ni ang.