Hman kum lawk khan, ‘Zorama political party tam lutuk hi 3 velah inhlawm thei ila,’ tih lam hawi khan ka rawn ziak tawh a. Kan duh emaw, duh lo emaw, India hnuaiah kan awm miau va, Multi-Party System-in kan kal miau si a. India ram pumah hian political party in-registered hi 500 vel an awm hial thin a, tuna a zat ka hre mai lo. Kan Zoram state tereuhte-ah hian mihring 1091014 (2011 Census) vel chauh kan awm a, chuti chungin party tenau nen chuan 10 dawn lai kan awm a. Tun hnaiah ZPM-ah 6 vel an intelkhawm ta mai pawh a. Heti chung hian MNF, Congress, MPC, ZNP, PRISM, BJP leh tun hnaia mi - Zoramthar, NPP kan la nei cheu va. Political party-te hi ram leh hnam hmangaiha rorelna tha zawk duh vanga ding an ni deuh zel a. Congress hi chu a hming ang hian India zepuia min hruai luh tum an ni a, a tha emaw, tha lo emaw, an hlawhtling phian. MNF hi Mizo hnam rilrua mi hruai luh tum an ni a, an hlawhtling thawkhat nain Congress aiin an zia an phawk tha lo zawk. Kum 50 chuang ve ve Zoramah an ding tawh. A dawta party rei deuh chu MPC, 1975-a din hi a ni a. Hming dang an invuah thin nain America anga party lian 2 inlal chhawk ringawt hi chu kan duh khawp lo deuh niin a lang a. Zoram politics kal tawh en erawh chuan Congress leh MNF han thlak thei awm hmel kan la hmu lo rih niin a lang. Inthlan dawn hnaih hian party thar a piang duh chawk a. Tunah pawh NPP a lo piang leh a. PRISM te pawh NGO ang ni tawh lovin political party-ah an inlet ta a, central-ah BJP hneh taka a sorkhar avangin Zoramah pawh ‘bial 40 kan chuh dawn’ an rawn ti ta mai. Chakma leh Tuikuk te chah khawmin hmanni khan an han kal khawm a, tlang rin aiin an tam tlat mai a, Kohhran Upa, Reverend leh B.A., M.A. pawh BJP-ah hian pangngai takin an tel ta nual mai. Zawl ram lam hawia politics kalpui, Zoramthar an lo piang zel bawk a. Englekhawle, RAM HMANGAIHTU kan ngah ta hle mai. Heng party-a telkher lo ram hmangaihtu, ram tana thahnemngai fu fu, thuziak mi kan la nei teuh bawk a. Kohhran hruaitu Upa leh Pastor ram vei hmel tak tak an la kat zut bawk. Heti taka ram hmangaihtu tamna si-ah hian, a hruaitute zir loh nge, mipui zir loh, kan ram chu kan la tha lo viau lawi si a, mak tak chu a ni. Politics hi han luhchilh mai chu awl tak, a taka ram tundin  tak tak chu har tak a lo ni. Thu tha leh dik tak han sawi mai te, han ziah mai te chu pen leh lehkhapuan a awm a, mic a awm bawk chuan a har lutuk lo a ni ang. Ram leh hnam dinchhuahna leh ngelnghehna thlen erawh chu rin aiin a har a nih ka ring. A CM rei ber, Pu Hawla meuh pawh a rei tual tual a, amah iaitu an lian telh telh mai a, ram dinchhuahna thlen ahnekin, mipuiin an hmuh dan a thlang her bum ta mai. Pu Zorama kum 10 CM pawh duh khawp lo an tam mai. La enchhin lohva insawi, Pu Duhawma pawhin mipui a hip ruih ruih bik si lo. Thuziak thiam P.L.Liandinga, Vanneihtluanga te meuh pawhin ZPM an awi nung zo dawn nange maw? A chuang tlai thuziak thiam leh huang nei hial, Rev. Chuauthuama te, an sawi K.L.Liana te ngat pawh hian party thar han din se sorkhar chu sawi loh, anmahni pahnih ngei ngei pawh hi an MLA zo ang em? Sumsuih lam, AS III-ah Pu K.L-a hi va in-candidate se, a tlin kan ring em? A tha lo chu a ni hauh lo vang, Congress, MNF candidate a khum zak ang emaw chu! Rinna chak a ngai khawp ang. A U Chuauva nen hian party thar din ve rawih mai se engnge an an ang? Ka sawi tum chu anmahni lam ni lovin, ram politics hi rin aiin a har tih hi a ni. Pastor leh Upa rual tel tamna, ZPM pawh hi kan bawh ruih ruih lem hauh lo. Mizote hian thil tha kan duh lo nge hruaitu tha zui tur kan hmu lo tih hi ka ngaihtuah fo thin. Heti taka ram hmangaihtu ngah si kan ram a chhe viau mai site, kawng chhe bawk, kawlphetha pur chaw reng mai, chaw takngialah pawh intodelh si lo, zu leh ruihhlo-in thalaite a suasam mek ni bawk si, Kristian ni thup si, Kristian nuna nung tha duh lo ngah hle si, hlemhletna (corruption) ni se kil tinah sawi tur a awm a, a tê deuhvin an eiru tlem deuhva, a lian deuhvin an eiru lian deuh a ni ber mai. Ram hmangaihtu kan ngah nag hu-in kan dinhmun a changkang der si lo, khawi lai berah nge maw kan tih fuh lo le. Kan awm dan hi lungawithlak loh tak chu a ni. Sap pa pakhat lokal chuan, “Mizoramah chuan mi tinin Pathian thu an sawi thei vek a, tumah thusawi inawihsak an awm bar si lo,” a ti e an ti. Kohhran ni se, pawl hrang a tam em em a, “80 chuang lai a awm,” an ti. Hruaitu tha, mi han hnuk khawm dawrh thei kan nei lo a ni chek ang. Kan ram hruaitute hian zawm duh se chuan tlangkam leh chanchinbu atang ngawt pawh hian finna khawp chu a awm mawle! Tlang ngaiha tih awm loh zawk hi an ti leh tlat thin. Hnam vannei tak nge kan nih vanduai tak tih pawh hriat a har hle. Chutichuan, tuna a lan dan mai mai chuan, Congress leh MNF, a eng zawk nge sorkhar ang tih hi a ni deuh mai a, a tu party pawh lo sorkhar se, sorkhar kan hrawn tawh aia tha fe nise a tha ber mai. Party tenau din neuh neuuh ngailo tura mi tin huap sorkhar siam tura kan inpuahchah a ngai ta ber a nih hi. ZPM hi an thu leh hla a tha, a hruaitute pawh an rintlak ang. Mahse, kumin atan chuan an tlai tawh deuh rih. “H.T.Sangliana sawm chhuak ula, Congress ni lo, MNF ni lo zawng hi intel khawm ula, chu pawh Aizawl-a pa fel hovin din mai lovin khaw tin atangin mipui khawmpui ko ula, khaw 500 atang talin palai lo kal se, mipuiin party thar din se a tha ang,” ka ti a; mahse, chutiang chuan an ti ta si lo va. Nikum September-ah ZPM hi a piang ta chauh va, Congress leh MNF mite an lo insawh nghet fu tawh si a, rin aiin thil a har a nih hi. Heti khawpa ram hmangaihtu tam si, kan politics dinhmun, vangtlang nun, ei leh bar dinhmun ngelnghet si lo hi khawiah nge he hnam hian a tih sual, eng nge a tih sual? Rinna-a Israel-te dinhmun hi i ngaihtuah ngun teh ang u.