Aizawl: Transport Minister John Rotluangliana chuan, “Kan ram leh hnam chawikanna tur leh hmasawnna tur atana pawimawh hmasa ber chu nute an ni,” a ti. Zirtawpni kaltaa Mamit Sub Hqrs. MHIP Conference vawi 15-na, Siamliana Hall, Mamita neihah he thu hi sawiin Transport Minister chuan, “Mizote zingah hmeichhiate'n hma an sawn nasa hle a, mipate zawk hi min chawikan kan ngai hle a. Kan ram leh hnam siamthat nan hian kan inlungrual a, kan inpumkhat a ngai a ni,” a ti a. Chhungkuaah hmeichhiate chu rinkai zawk leh chhawr nahawm zawk an nih thu sawiin eizawnna kawng hrang hrangah mipa tihtur nia ngaihah pawh hmeichhia hian tih theih loh an nei tawh lo niin a sawi a. Nute chu chhungkaw hlamchhiah khawp a thil ti lo turin a chah bawk. Sub Hqrs MHIP Conference vawi 15 naah hian kum 2018-2020 atan thupui atan ‘'Faina leh thianghlimna’ tih chu hman a ni dawn a ni.