Aizawl: PHE Minister Zodintluanga chuan, "Kum 2013 atanga vawiin ni thlenga ram hruaitute zingah eirukna avanga buai a la awm lo hi a lawmawm tak zet a ni," a ti. Nimin zinga Buarpui PWD Rest House tuala vantlang inkhawmah thu sawiin Congress Legislature Party Treasurer ni bawk Zodintluanga chuan Congress sawrkarin hna a thawh that avangin term thumnaah hnehna an chan leh ngei tur thu sawiin, "Thalai leh mipui chhawr tur hi hmun tinah hmuh tur a awm a, kan party sawi chu mipui nin vanga sawrkar loh lam a ni lo a, development kan siam avang hian term thum chu kan sawrkar ang tih kan puang tawp mai a ni," a ti bawk. PHE Minister chuan Aizawl khawpui bikah ni khata darkar 24 tui pek tumin hma lak chhoh mek a nih thu a sawi a, kangmei chhuaha kangthelh motor-in tui a thunna tur Fire Hydrant hmun 15-ah siam a ni tawh tih a sawi a, GAWSS Phase-I pipe kum 30 laia upa tawh chu a thara thlak vek a nih tur thu a sawi bawk.