Aizawl: Finance Minister Lalsawta chuan Mizoram Upa Pawl member te chu an tawnhriat hlu takte hmanga ram khalhngiltu leh thurawn petu ni zel turin a sawm. Nimina Mizoram Upa Pawl, Aizawl South-II Area General Conference vawi 27-na, SMTC, Mission Vengthlanga neih a hmanpuinaah Finance Minister chuan, “Mizoram tana thil tha tur ngaihtuah a ngaihven reng thin pawl hlu tak MUP kan nei hi kan vanneihna a ni a. “Tunlai thangtharten anni atang hian zir tur tam tak kan nei a ni,” a ti. Sawrkar hmalakna NEDP hmangin sawrkar hna a innghat kher lova eizawnna ngelnghet thangtharten an neih theih nan hma lak mek a nih thu Finance Minister chuansawiin, hengah te hian hlawhtling tur chuan remhriatna leh bultanna sum mai ni lovin taimakna leh tumruhna a pawimawh thu a sawi bawk. MUP Aizawl South-II Area General Conference-ah hian Unit pakua (Mission Veng, Mission Vengthlang, Tuikhuahtlang, Thakthing, Dam Veng, Venghnuai, Model Veng, Salem Veng leh ITI Veng) awmin, a vaiin member 2141 an awm a. Kum 2017-2018 chhung khan member boral mi 89 an awm a ni.