Aizawl July 8, 2024: Vawiin khan ZPM Party Office ah chhung Inkhawm neih a ni a, thusawitu Consultant C. Chalsawithanga chuan, tun Sawrkarah an Legislator-ten dan thar engemawzat an duang chho ta mek niin a hria a, a lawm thu a sawi a. Pu berte fakna dan ringawt ni lo, ram mipui mamawh dan tha siam kawngah theihtawp chhuah zel a ngai, a ti.

C. Chalsawithanga chuan, ““MLA-te hi dan siamtu turte an ni a, mipuite hman tur leh tangkai dan tha tak kan mamawh reng a, chumi rual chuan tha taka kenkawh pawh a ngai. Tun hma lama kan legislator-te khan dan chu siam ve bawk mah se, kan ram leilung mil leh, kan sakhaw milte, kan sik leh sa mila dan siam chhoh zel a tul a. Kalphung thar kan tih hi System thar tihna a ni a, khawvel ram hrang hrang hian ram inrelbawlna tha nei turin Dan tha tak tak an siam thin a, dan tel lo chuan ram changkang a awm thei lo a ni."

"Mizoram-ah pawh District Council hun lai khan kan nu leh pa te hriatna leh thiamna lamah pawh degree sang la nei lote kha legislators niin, anni chuan thangthar ten an rawn siam that leh turin dan 100 chuang lai min lo hnutchhiah a, hun a lo inher zel a, District Council hun a liam a, UT kan nih hnu pawh khan dan siamthat aiin sum leh pai lamin kan rilru a luah ta zawk niin a lang a, kan mi hmasaten dan siam lam an rilruah a la lang vak lo a ni. Tun hnuah State kan lo ni ta a, mithiam tak tak MLA kan lo nei ta, chuti chung pawhin dan lam kan ngaihthah chho ta zela, Central atanga dan lokal sum keng tel erawh kan umzui chak em em thung a, nihmahsela mipui tana hamthatna tur leh ram hmasawnna tur lam kawngah chuan DAN thar hi siam kan harsat em em mai a ni,” a ti.

Sawia chuan, “Kum 20 lai zalenna sualin, mahni inrelbawla dan siam ve thei nih inbeiseiin kan bei a, hlawhtling lo mah i la, India Sawrkar chuan State-ah min hlangkaiin mahnia, dan insiam ve thei turin min buatsaih a, nimahsela, kan legislator lo ni tawhte khan, mipuite tana DAN tha siam ai chuan Khuallian ni a thil hawn tur kan zawng ber niin a lang a, kan ram leilung mil leh kan sakhaw mil, kan sik leh sa mila dan siam hi a tul ta hle a, Tun Sawrkar ah hian kan Legislator-ten dan thar an duang chho ta mek niin ka hriaa, ka lawm hle a ni," a ti.