ZALEN, Oct. 22, 2024: Rohtak, Haryana-a ram pum huapa boxing inelnaah Thawhlehni khan Mizo pahnihin gold medal an hnek chhuak.

Kar kal ta Thawhlehni atanga Boxing Federeation of India (BFI) buatsaih, REC Combined National Talent Hunt Boxing Programme 2024-25-ah hian TC Malsawmkimi leh J.Joseph Bulhringpachha te chuan an inlanna huangah an chak ber ve ve a ni.

Serchhip boxer Sawmkimi hi 48-50kg (junior)-ah inlanin final-ah hian inelna thlengtu, Haryana boxer Kashish Malik hnehin a gold medal a la a. Siaha Boxer Joseph hian 52-54kg-ah Uttar Pradesh boxer Aryan hnehin gold a hnek chhuak bawk.

Sawmkimi hian nikum khan Serchhip District Boxing Association (SEDBA) puihna (sponsor)-in Rohtak-ah tho hian REC Combined National level Talent Hunt Programme 2023-24 khan gold a lo hnek chhuak tawh bawk.

Nikuma a champion hnuah hian India rama hmeichhe boxing zirna tha bera ngaih, Guwahati, Assam-a Ntional Center of Excellent (NCOE)-a awm tura sawmna a dawn angin May, 2024 khan a lut a, heta tang hian ram pum huap inelna a hmachhawn mek zel a ni.

Siaha boxer Joseph pawh hi April thlaa REC Combined National level Talent Hunt Programme 2023-2024-ah khan final a lo thleng tawh a. Tun tumah erawh chuan chak ber nihna nen a haw dawn ta a ni.

Tun tum inelnaah hian Mizo boxer pali an tel a. Julie Ngurthansangi, East Lungdar leh Esther Lallawmsangi, Reiex te erawh a vanduaiah tangin medal an la phak lo.