Aizawl;India ram pumah nausen thi 'Infant Mortality Rate IMR)' a tlakhniam laiin Mizoramah chuan kum hmasa nen a inang a, hmasawnna emaw tlakhniamna a awm hran lo. Mipuiah inhrilhhriat a tam loh vangin hma an sawn thei lo niin hnathawkte chuan Zalen an hrilh bawk. Census Department-in Sample Rgistration Survey (SRS) tunhnaia a tihchhuah thar ah chuan India rama nausen, kum khat tlin hmaa thi IMR rate chu kum hmasa ah 40 a nih laiin nikum ah chuan 38 a ni a. Mizoramah chuan kum hmasa leh nikum thleng khan 35 ah a la ding reng hrih a ni. Census hian Mizoram hi unit 40-ah thenin thingtlang leh khawpui 20 ve ve ah sample hi an la a,mihring 33,000 a lak a niin hei hian khawpui a mihring 19,000 leh thingtlanga mihring 14,000 te a huam a ni. Health Department a Reproductive & Child Health changtu Dr. R.Lal-thanga chuan Mizoram a IMR a tlakhniam theih loh chungchang-ah a chhan chi hrang hrang a awm tih a sawi a. "Health Department in theihtawp chhuah mah ila, thuneitu dang PWD, PHE, Education leh a dangte nen kan tanho that loh chuan hmalak chak a har a ni," a ti Dr.Lalthanga chuan IMR chu tunhnaia sang hluai ni lovin report a luh that tak avang leh inbiakpawhna a that tak avanga chanchin kan inhrilh zung zung theih avangin a sang angin a lang mai nia a hriat thu a sawi a. Hmeichhia, naupang lutuk a fa nei leh fa pakhatna ah thi an tam bik tih a sawi bawk. Mizoram chhimlam district a IMR san chhanah political leh administrative support an hmuh that tawk lo vangah a ngai a. "Mipui hrilhhriat phawt a pawimawh ber a ni" a ti bawk a ni.