ZALEN January 24, 2025 : Mizoram Pradesh Congress Committee chuan vawiin khan Congress Bhavan, Aizawl-ah Friday Political Session an hmang a, he huna thusawitu Vice President Lalnunmawia Chuaungo chuan ZPM sawrkar chu ram tana thil pawi leh siamthat harsa tur thil an khawih anih chuan an bei zel dawn tih a sawi. 

MPCC Senior Vice President Lalnunmawia Chuaungo chuan, "ZPM party hi party hrang hrang atanga tlankhawm an ni a. An inzuar thiam bawk a, mipui ten beiseina an lakah an nei a. A beisei lemlo te pawhin enchhin ve hrim hrim duhna an nei a, hneh takin Mizoram mipuiten an thlang tling a ni. Kum khat chuang an sawrkar ta a, hetih lai hian mi tam takin Congress party hi ngawi reng angah leh sawrkar kal dik lohna sawi tam lovah min ngai a, hengte hi kan hre lo a ni lo. Kum khat em an la sawrkar lova, an intiam kamna an tih leh loh te, an ti lo tura an intiam an tih leh si te, ram tana thil pawi leh nakina siamthat harsa tur thil pawi an khawih anih chuan kan bei zel dawn," a ti.

Ram tihchhiata a awm loh nan leh mipuite thlavang hauh nan an sawi chhuak ve tan tawh dawn tih sawiin, "Mi hausate an hausak belh thur thur ringawt hi ram hmasawnna a ni lova, chiang taka kan hmuh chu mipui nawlpui in hma an sawn chuan ramin hma a sawn a ni. Mipui nawlpuiin sum an neih loh a, thil leina tur an neih hleihtheih loh chuan sumdawngte pawhin an tuar thin. Chuvangin mipui nawlpui kutah sum a luh theih nan NLUP changtlung zawk, chhungkaw tin ten an hlawhtlinpui theih tur Congress party chuan hma lak kan tum a ni. A thlawna sem lam a ni lova, mipuiten lei rem an rah leh theihna tur, ramin hma a sawnna tur a ni," a ti.

Local Council leh Village Council inthlan turah party mi te fuihin, "Buh kan tuh loh chuan a rah seng tur a awm ngai lo. Tuna Local Council leh Village Council kan inthlang tur te hi kan buh tuhna hmasa a ni a, nakina a rah kan seng leh tur a ni, chuvangin tan kan lak a ngai a ni. Kan party hruaitute pawh kan thlawp that a, kan thawhpui that a ngai a ni. A hun leh a hmunah, kan duh dan te kan hotute hnenah thlen ila, kan party in kan hlawkpui dawn a ni."

"Congress party hi miten a tak taka thawk thei tur kan ni tih an hre chho mek a ni. Tunah pawh ram hmangaihtu mithar tha tak tak ten min rawn zawm mek a ni. Heng kan mithar te hi kan party min tichak turin MPCC hmingin lawm takin ka lawmlut a ni." a ti.