Aizawl September 25, 2024 : Ramhlun North Branch YMA chuan thuchhuah siamin September ni 21, 2024 zana Durtlang Leitan a pawisawi lote chunga tharum thawhna thlenga pawikhawihtu ni a hriat zinga panga, an branch member te thil tih leh chetdan chu pawi an tiin zahthlak an ti hle a, Ramhlun North YMA chuan an member mi panga te thil tih hi engti kawng maha ngaihzam leh en liam mai chi-ah a ngai lova, hetiang thil duhawm lo hi tu chungah mah a thlen nawn tawh loh nan thil sual ti tu ten an phu tawk hremna hmu ngei se an ti.

He tharum thawhna avanga hliam tuar- Dr. Laldinliana Sailo s/o Lalhmangaiha Sailo, Zemabawk North, Dr. Rinngheta Renthlei s/o Dr. RL Sanghluna, Durtlang leh Lalthlamuana s/o P.L. Ropara, Durtlang Mel-5 te an tawrhpuiin, an chunga an member-te chetdan avang hian thupha an chawi mawlh mawlh a ni. Tihdam hna thawktu te chunga natna thlentuah an member te an lo tang ta mai hi zahthlak an tiin pawi an ti a, hliam tuar ten mipuite tana an rawngbawlna pawimawh tak, tihdam hna an thawh leh ngei theih nan dam leh thuai turin duhsakna an hlan a, Durtlang Branch YMA, Durtlang Mel-5 Branch YMA leh Zemabawk North Branch YMA leh khawtlang mipuite chungah pawh he thil thlengah hian thupha an chawi a ni.

He tharum thawhnaa pawikhawihtu ni a hriat kan member- Lalmalsawma Zote s/o Vanlalruata Zote, Mark Zairemmawia s/o Lalsiamkunga, Lalvenpuia s/o Rinchungnunga, Vanlalpekhlua s/o H. Thangzela (L) leh K. Vanlaltharzela s/o K. Ramengmawia te hi an thil tih leh chetdan pawi zia an hriat chhuah a, an sim ngei theih nan Ramhlun North Branch YMA chuan tukin zing karah koin a zilhhau a ni.