Aizawl:Mizoram State Medicinal Plant Board thukhawm chuan 2015-2016 Action Plan siamin hmalakna kal mek te an thlirho bawk a.  SMPB Vision thlirho a ni a, ramhmul damdawi te chu Mizoramah tha tak tak a awm tih sawiin a ral mai loh nan siamchhuaha thawnchhuah a tul thu sawi a ni a; ram pawn atanga lakluh te chuan ram chhung ami a luahlan loh nan tan lak a ngaih thu mithiamte chuan an sawi bawk. He hun hi SMPB Chairman leh Health Minister ni bawk Lal Thanzara chuan kaihruaiin SMPB CEOP Dr C Lallunghnema chuan "Department of Medicinal and Aromatic Plant, MZU te nen ramhmul chin uar chu  ram economy nghawng thei niin loneitute hnenah awarness thui tak kan kalpui tawh a, Nursery 12 tan Nuai 6.25 leh cultivation atan Nuai 8.134 pek a nih tawh,” tiin a sawi a. Aloe Vera leh Sunhlu chingtute hnenah sum hlan a nih thu Board a hrilh bawk a ni. CEO chuan Mizorama medicinal plant 17 lai chu Central lamin an pawmpui tawh thu tunkar laihawl Board meeting neihah a sawi bawk a ni. Hmathlir sawihonaah Medicinal Plants Consortium of Mizoram chu pharh a niin Mizorama chin theih 80% chu medicinal plant an  nih thu leh hralhchhuah tham ramin a thar chhuah a pawimawh thu mithiamte hnen atangin ngaihthlak a ni a. District tina tam tham chin te, warehouse, packing leh thiamna hmanga la finfiah loh ramhmul damdawi dapchhuah theih a nih dante entir a ni bawk.