October 1, 2023; Ram chhung hmun dangah ram pum huap faina beihpui thlakna ni (nationwide cleanliness drive) vawiinah huaihawt nimahse, Pathianni a nih avangin Mizoram sawrkar chuan a hmang ve lo.

Tarlan tawh angin, Chief Minister Zoramthanga chuan a IG account a a tarlan danin, Mahatma Gandhi piancham October ni 2 puala Faina Ni hman thin chu India ram pumah hlawhtling taka hman a nih theih na'n sawrkar laipui chuan Faina Ni beihpui thlak chu September ni 15 atanga October ni 2, 2023 thleng neih turin ruahmanna a siam a. Amaherawhchu October ni 1 hi Pathianni (Sunday) a nih avangin Kohhran mite tan he ni-ah hian faina beihpui thlak a remchang dawn lova. Chuvangin Kohhran member-te tel vek theih nan naktuk, October ni 2, 2023 atangin Faina beihpui thlak hi kalpui tura ruahmanna siam tur a ni. Hei hi Faina Hapta inṭanna a ni nghal bawk dawn a ni, a ti.

Mizoram Kohhran Hruaitute Committee (MKHC) chuan Pathianni a faina beihpui thlak hi Mizoramah chuan ti ve lo turin Chief Minister hi an lo ngen tawh a.

Central YMA pawhin Kristiante ni serh Pathianni kher sorkar thil pawimawh buatsaih hi tha an tih loh thu an lo sawi tawh bawk.