Central YMA leh Public Health Engineering Department tangkawp buatsaih rampum huap leng khawm zai intihsiak chu zawhfel a ni ta a, Republic Veng Branch YMA te chu pakhatna an ni. Pakhatna hian Rs. 1,00,000 (nuai khat) leh lawmpuina thuziak an dawng a ni. 

Pahnihna chu Rawpuichhip Branch YMA te an ni a, Rs. 70,000 + thuziak an dawng a ni. Chawnpui Branch YMA  te chu pathumna an ni a, Rs. 50,000 bakah thuziak an dawng tel bawk. Top 10-ah hian Aizawl khawpui pawn atangin Branch pahnih - Rawpuichhip leh Ngentiang te chauh an lang a, a thiam ber ni phak ta chiah lo mah se an thlen chinah fak an phu hle. 

Mimal lawmman 
Rampum huap leng khawm zai intihsiakah hian mimal lawmman siam a ni a, ngaihhlut pawh a hlawh hle. Hla hril thiam ber atan nula Ramengpuii, Ngentiang Branch YMA chu thlan a ni a, TV leh YouTube kaltlanga lo entute chuan a phu hle tih an pawm tlang ngei ang. Branch angin an tum ram theng phak chiah lo mah se, mimal lawmman an lak bakah mipui tan rawn an hlawh avangin hlawhtlinna ropui tak a tih theih awm e.  

Khuangpu tha ber atan lawmman pathumna dawngtu Chawnpui Branch YMA atangin an khuangpu tha mi - Pu Lalsangluaia leh Pu Robert C. Lalhmangaiha ten lawmman an dawng a, tuma thik rual an ni awm lo e. 
Central YMA leh PHE Department tangkawp rampum huap leng khawm zai intihsiakah hian Branch 50 ten hming an pe lut a, Branch 49 ten intihsiak an hmachhawn a ni. 

Fak phu Ngentiang
Intihsiak tihlawhtlingtu mai ni lo a, a tihlu zualtu zinga chhiar tel loh theih loh chu Ngentiang Branch YMA te an ni. Anni hian hmun hla tak atangin he intihsiaka tel tur hian motor pahnih hmangin Aizawl an rawn pan a, an inpekna a fakawm tak zet. Inbuatsaihna tha tak an nei tih rawn lan tirin, top 10 hial an inhlangkai. 

Top 10 lut zingah mipui tan hlawh ber tih ngam an ni a, final zanah hian che sual zeuh lo se chu top 3-a lang phak hial tura beisei an ni hial. Heti chuang hian mipui lawm an hlawh a, an insensona leh an inbuatsaihna a fakawm tak zet a ni - an kal leh zelna turah ZALEN chhungkua chuan duhsakna kan hlan e. 

Pakhatna - Republic Veng Branch YMA - Rs. 1,00,000 + Thuziak 
Pahnihna - Rawpuichhip Branch YMA - Rs. 70,000 + Thuziak
Pathumna - Chawnpui Branch YMA - Rs. 50,000 + Thuziak

Mimal lawmman : 
Hla hril thiam ber - Nl. Ramengpuii, Ngentiang Branch YMA
Khuangpu tha ber - Pu Lalsangluaia & Pu Robert C. Lalhmangaiha, Chawnpui Branch YMA