November 13, 2023; Nizan (12.11.23) atanga Myanmar sipai leh People Defence Force (PDF) leh an tanrualpui te inkahna-ah Zokhawthar a raltlan pakhat silaimu a tawn palh avangin a thi a, hliam tuar mi 20 te Champhai damdawiin thlenpui an ni tawh.

Thulakna in a tarlan danin, nizan thim hlim atang khan Kachin Independent Army (KIA), Chin National Army (CNA) leh Chin Defence Force (CDF) tangrual chuan Rihkhawdar leh Khawmawi chuanchunga Myanmar sipai bahrik chu lak ngei tumin an kap a. Sipai lamin an kaplet ve a. Tukin khan Rihkhawdar sipai bahrik hi tangrual lam hian an la tawh a, Khawmawi-ah inbeihna a la kal mek.

Myanmar indo thlawhna leh helicopter-te chuan Rihkhawdar leh Khawmawi-ah bomb an rawn thlak a. Zokhawthar ami raltlan kum khat zet awm tawh kum 51 mi, raltlante chaw pe tura kal chu Myanmar lam atanga silaimu dawng fuhin a mitah an kap fuh a, a thi nghal a. KIA leh CDF hliam 17-te chu Mizoram lamah rawn luhpui-in an zinga na zual mi 5-te chu Aizawl lamah rawn kalpui mek an ni.

Hliamte hi Zokhawthar a Mercy Medical Health Centre-ah dahlut phawtin Champhai District Hospital-ah sawn leh an ni. Khawmawi leh a chhehvel khua atangin Champhai district-ah raltlan 5,000 an tling tawh ni a thudawn a ni bawk.

Inkahna avanga hliam tuar, thisen pek ngai an awm nual avangin Champhai Sub Hqrs.YMA chuan mi tupawh, tlawmngai a thisen pe thei apiangte Champhai District Hospital Blood bank a thisen pe turin an sawm a, mi tlawmngai thahnem tak thisen pe turin an pungkhawm mek a ni.

Silaimu leng in a kah fuh avanga thi ta Chungthianmawia, (kum 51) Myanmar atanga rawn ratlan, Zokhawthar venghnuai a awm mek hi vawiin chawhnu dar 1 khan Zokhawthar YMA hall ah Rev. Laldeihpau EBC kohhran chuan a vui a, Zokhawthar thlanmualah phum a ni. A nupui damlo hi Tahan, Myanmar ah enkawl mek a ni a, a fate mi 7 naupang te te a kalsan a ni.

An inkahna-ah hian Zokhawthar venghnuai lama awm mi 3-te’n silaimu per an dawn avangin veng sang lam hmun himah an insuan chhuak hlawm a. Myanmar sipai lam hian Rocket propelled grenade (RPG) an hman avangin bomb siper tawng an awm nual ni a thudawn a ni. Hmun him lama chhuak turin YMA information centre aţangin an inngen a ni.

Zokhawthar YMA hruaitute’n an sawi dan chuan sipai bahrik bei tur hian kar kalta khan KIA-ho hi Chin state-ah an rawn lut tawh a. CNA leh CDF-te nen hian hun engemawti atang khan ruahmanna an lo siam lawk tawh niin a lang.

Zokhawthar VCP Lalmuanpuia chuan raltlan rawn lut zat hi an la hriat theih mai loh thu sawiin, an tam viau niin a sawi a. A hma lama inkahna a awm a Khawmawi, Haimual leh Rihkhawdar aţanga Zokhawthar a rawn raltlan tam berte chu kir leh tawh mah se, tun thilthleng avang hian an rawn chhuk leh deuh vek dawn ni a a rin thu a sawi. Khawmawi sipai bahrik hi mipui sipai, KIA leh CNA ţangrual hian an la la thei mai lova, lak ngei tumin beihpui an thlak mek ni a thudawn a ni.