ZALEN November 30, 2025: Home Minister K.Sapdanga chuan ramri buai chin fel dan turah Mizoram leh Assam lam duh dan a inang lo tih sawiin inbiak leh hun turah Assam lam an ngaichang leh tih a sawi.

Tun hnaia chanchinbumite nen an inkawmnaah Home Minister K.Sapdanga chuan ramri buai chungchanga Assam sawrkar biak chu thil hahthlak tak a nih thu a sawi a. “Mizoram lam chuan kan ramri hi rin fel thuai thuai kan duh a, ngaihruat ringawt ramri neih chu tha kan ti lo a. Assam lam erawh chuan buai a awm loh chuan an duh tawk in an lungawipui mai a, ramriah buaina a awm loh chuan an duhtawk em em ringawt mai a ni,” a ti.

Home minister chuan Mizoram sawrkar thar a pian hnuah ramri chungchangah hian tum hnih Aizawl leh Guwahati ah te inbiakna neih a ni tawh tih sawiin inbiakna nei leh turin rawtna an siam a, Assam lamin an la chhang lo tih a sawi bawk a. “Aizawla kan inbiak tum khan meeting minute pawh kan tichhuak nghal a, Guwahati-a kan inbiak tuma minute erawh an tichhuak hlei thei lo a, vawi tam tak kan nawr hnuah tun hnai khan an tichhuak ve chauh a ni,” a ti.

Home minister chuan state pahnihte Aizawla inbe leh turin Assam lam chu an nawr reng tih sawi bawkin Assam sawrkar atangin chhanna an la hmu lo niin a sawi a, ramri chungchanga Assam biak chu a hahthlak a tih thu a sawi bawk.

ZPM kaihhruai sawrkar a din hnuah Mizoram leh Assam hi ramri chungchangah tum hnih an inbe tawh a. Inbiakna hmasa hi August 9, 2024 khan State Guest House, Chaltlangah neih a ni a, a tum hnihna hi kumin April 25, 2025 khan Guwahati-ah neih leh a ni a. Inbiak tum thumna hi Aizawlah nei leh tura rawt mek a ni.

Ramri chungchanga state pahnihte inbiaknaah hian Mizoram sawrkar aiawhte hi Home Minister K.Sapdanga chuan a ho a, Assam lam hi Border Protection & Development Minister Atul Bora in a ho thung a ni.

Mizoram leh Assam ramri chungchangah hian pawm dan a inan loh avangin buaina tenau tum engemaw zat a chhuak tawh a. Ramri chungchang kaihhnawihah hian July 26, 2021 khan Vairengte daiah Mizoram leh Assam police te an inkap a, Assam police mi leh sa paruk thiin Vairangte mi pakhatin hliam a tuar a ni.

MNF kaihhruai sawrkar lai khan khatih laia home minister, Lalchamliana leh Assam Border Protection & Development Minister Atul Bora te chu tum hnih Aizawl leh Guwahati-ah an inbe tawh bawk.