Aizawl: Assam sawrkarin tunhnaia National Register of Citizens (NRC) a tihchhuah vangin Mizoram sawrkar chuan ramri-ah police a dah belh a, hriat theih chinah NRC vanga state atanga Mizoram a lut an la awm lo. NRC vanga an hmalakna chungchang Zalen zawhna chhangin Mizoram Police IGP (Law & Order) LH Shanliana chuan, “Mizoram leh Assam ramria Border Out Post-ahte police kan dahbelh bakah chhun leh zanah patrolling kan nei a. Hei bakah ILP chungchangah pawh uluk lehzualin hma kan la bawk a. Tun dinhmunah chuan Assam atanga rawn lut an awm kan hre lo a ni,” a ti. IGP chuan police-te chu an inring (alert) reng nia sawiin Assam laili atanga chhuakte chu Mizoram ai chuan Karimganj district an pan zawk a rin thu leh Mizote nen hmel a  inan loh em avanga hriat chhuah an awl tur thu a sawi bawk. Mizo Zirlai Pawl (MZP) chuan Assam sawrkarin NRC a tihchhuah vang hian an state chhunga cheng mi nuai 40 te chu hmundangah an tlanchhe mek nia sawiin sawrkar chu hma la tura an phut thu an sawi. Sawrkar hmalakna hi August 15, 2018 thleng ngaihchan an tum nia sawiin an duh anga hmalakna a awm loh chuan a tul anga checkgate siama hmalak an tum a ni. MZP hruaitute chuan tun dinhmunah sawrkar hmalakna an ngaichang mek niin Zalen palai an hrilh.