ZALEN March 8, 2026: Home Minister K Sapdanga’n Mizoram - Assam ramri chungchangah Mizoram sawrkar dinna leh in inghahna chu Cachar Inner Line of 1875 a nih thu a tarlang a. Ramri ching fel turin state pahnihten vawi duai lo sawihona an nei tawh niin a tar lang bawk.

Assembly budget session neih mek a member-te zawhna ziaka a chhan danin home minister chuan ramri chungchanga Mizoram sawrkar dinna chu Cachar Inner Line of 1875 vide Notification No. 2299P dated 20th August, 1875 a nih thu leh Mizoram Assam hnuaia district council a nih lai, kum 1958 - 1959 bawrvel daih tawh atang khan he a dinna hi a la ngai reng tih a tar lang.

Hetih lai hian Assam sawrkar chuan Notification No. 2106 A.P. dated 9th March, 1933-in a tar lan, ‘Inner Line’ of the Lushai Hills District chu hman atangin a dinna a la ni ve reng thung tih a tar lang bawk.

Home minister-in ziaka house a hrilh danin Mizoram ngaihdan Assam nen a inan loh avang hian Mizoram sawrkar chuan hmalakna thahnem tak nei tawhin sawrkar laipui pawh vawi eng emaw zat a dawr tawh a, chu mai bakah vawi duai lo state pahnihte hian sawihona an nei tawh thin bawk a. Sawrkar laipui pawhin he buaina hi hriatpuiin ramri buaina tifel tur leh tihfel a nih thuai theih nan hma pawh a lo la ve tawh bawk thin a ni.

Hetianga sawrkar laipuiin hman atanga ramri buaina hi a hriatpui tawh a nih avang hian a hranpa a hriattirna Mizoram sawrkar chuan a nei lo va. July 8, 2019-a Council of Minister meeting chuan Mizoram sawrkar chu ramri chungchangah Cachar Inner Line of 1875 chu a pawm thar ni loin a dinna ngai reng a la ni tih hriattir nawn lehin Mizorama all political parties leh all NG0s te pawhin inlungrual takin in an pawmpui tih a tar lang a ni.