ZALEN October 23, 2023 : MNF dincham tum 62-na lawmna hun vawiin khan Mizo Hnam Runah neih a ni a, Zoramthanga chuan thu sawiin, thangthar zelte hnam thutlungah an harh thar mek chu lawmawm a ti a. "Ram hrang hranga kan unaute'n beih an tawh mek lai hian Thangtharte'n Nationalism an champion pui zel ang," a ti. Assam ramri atanga Mizo Police te hnuklet tura tih a nih pawhin, CM atanga a ban a ngaih tur thu in a chhang tih a sawi.

Zorama chuan Myanmar leh Bangladesh atanga rawn raltlante chu thawn kir tura Central sawrkar-in an ti chungin an hum tlat tih a sawi a. "Ngheta taka nationalism vuantute sawrkar lovin, tute emaw sawrkar se chuan vauna nen sum nen an bei ang a, 'in tih tlat chuan' tiin kan unaute hi meitei ho tih angin an ramah an thawn let tawh ngei ang. Keini erawh chuan central sawrkar thu zawm lovin kan hum tlat zel dawn a ni," a ti a. "Assam ramri atanga Mizo Police inhnuklet tura tih kan nih pawhin, 'CM atanga kan ban a ngai ang,' tiin ka chhang a, min nawr zui ngam ta lo," a ti bawk.

MNF President chuan MNF chu mi tlawm te tein October ni 22, 2961-a Pu Laldenga In, Tuikhuahtlanga an din a nih thu a sawi a. "MNF hi Pathianin ropui taka ram hruai tura a duan a ni mai lo a, hreawm tam tak tuar tura a duan a ni. MNF Party hian hreawm tam tak a tuar reng a, ram buai, inkah, President rule puan hnan leh thil tam tak a tuar a. Chuti chung chuan India rama party hlun leh nghet ber pawl ni turin kum 62 zet Pathianin a hruai ta a ni," a ti a. "Pathian leh kan ram tan he party hian hmalam a pan zel dawn a ni," a ti.

MNF President chuan, MNF boruak a tha chho zel tih sawiin, "Hmun hrang hrangah nationalism thlipui a thleh thar leh mek a, MNF-in lawmluh kan nei nasa hle a. Kan bialah phei chuan lawmluh tur a inkahpupchaw nasa hle. MNF hi Pathianin kawng laklawhah min kalsan lovang, sawrkar tura kan mamawh tawk MLA min pe ngei ang," a ti.