Zirtawpni kalta khan Mamit District chhung Thinghlun khuaa Mizo thlam pakhat chu Assam lam thuneitu nia hriat ten halin a bul vela kuhva kung awm ang angte chu an sam thlu vek niin an sawi a. Hei hian state pahnih ramri vel boruak a ti tang thar leh deuh a, eng angin nge Mizoram sawrkarin hmalak a tum hriat a ni hrih lova, engpawhnise kan buaina hi boruak muanawm tak hnuaiah a chinfel ngei beisei ang u.

Mizoram hian international leh state ah te ramri a nei a. International ramri a neih Myanmar leh Bangladesh lamah hi chuan ramri inchuha buaina kan nei ngai lova, hei hi a chhan ber chu ramri chiang tak kan neih vang niin a lang. Myanmar lamah chuan Tiau leh Chhimtuipui a luang a, chutiang bawkin Bangladesh lamah pawh Khawthlangtuipui a luang bawk a. India ram state ramri kan neih pathum Manipur, Tripura leh Assam zingah hian Manipur leh Tripura nen chuan ram inchuh kan nei lova, hetih lai erawh chuan Assam nen erawh ramri buai chinfel mai loh kan nei reng thung.

Assam nena kan buai chhan hi hmun dang te nen kan ramri a lui luang a awm ve loh vang ni berin a lang a. State pahnih ten ramri a kan pawm a inang lo a, ramri chungchang hi sawifel thuai a nih loh chuan hun lo la kal zel turah pawh kan la buai zel dawn niin a lang. State pahnih te hian kan ram china kan chhal hi a inanglo ve ve a, Mizoram in kan state chhunga kan ngaih ram zau tak hi Assam state chhungah a awm a, chutiang bawkin Assam pawh hian kan luah chin tam tak hi an ramah an ngai ve bawk a ni.

Assam nen kan ramri chungchangah hian kan buai ta zauh zauh mai a. Kan buaina ah hian Mizoram hi a dawih zawk leh a tlanchhe zawkah kan tang ta zel em ni tih a awl ta rum rum mai. Bairabi bul Zophai-a kan nu leh pa te leilet te chu Assam lamin kan ta a ni an tih avangin enkawl zui ngam lo te kan awm ta a. Chutiang zelin Vairengte lamah nise state pahnih ten insak loh tur an tihna hmunah tunhnai maiah Assam lam chuan in tam tak an sa zui leh mai a. Keinin 'status quo' tia kan lo zah em em hi kan thenawmte hi chuan an zah ve lemlo em ni chu aw a tih theih a. Hei hian ngaihtuah a ti thui duh khawp mai.

Tun tumah pawh Mamit district chhunga ngaihah Assam thuneitute chu an rawn che leh ta a, dawhkan kila tha taka thil sawiho theih a nih laia tharum leh mi rikrap zawnga state thenawm te an rawn che ta mai hi a demawm tak zet a ni. Assam nena kan ramri buai hi chinfel a nih loh chuan buaina hi chu kan la nei fo dawn tih a hriat reng mai a, kan buaina hi a tharum zawng ni lova fing taka kan chinfel thiam a pawimawh. Ramri buai a lo awm anih pawhin eptu lam te hian party hamthatna atan hman an tum fo thin a, hei hi kan hnam tan a him loh theih avangin sawrkar hmalakna ngaichang chungin kan zavaia tanrualna tur zawk a ni tih i hre thar leh ang u.