February 8, 2023; BJP Mizoram Pradesh Vice President R. Vanramchhuanga chuan thuthar thehdarhtute kawmin, Mizoram sawrkar chu ramri buai chin fel tum lova, mipui bumna atan chauh a hmala an ni tih a sawi.

Vawiin khan Aizawl Press Club ah thuthar thehdarhtute kawmin, R. Vanramchhuanga chuan, Assam CM Dr. Hemanta Biswa Sharma-an CM Zoramthanga dinna a hrechiang tih sawiin, chumi vang chuan Assam police te chu Mizoram chhung ngeiah, an duhna hmun hmunah camp siamin an awm chilh hmak niin a sawi.

"Mizote lo leh huante an luah luih sak a, Assm CM chuan inti thei takin 20.12.2022 khan Assam Legislative Assembly ah Mizoram acre 1800 kan laksak tiin a sawi a nih kha, Mizoram Home Minister in Assam sawrkarin Mizoram an lak kan hre lo, ti mah se, Kolasib leh Mamit district huam chhung a Assam police awm tlatte khu Mizoram sawrkarin a um chhuah loh chuan Mizoram leilung zau tak mai hi Assam hian min chhuhsak ngei a ni," a ti.

Mizoram leh Assam Minister te inbiak vawi 3 na 17.11.2022 a joint statement point khatna ah, Mizoram sawrkarin Mizoram chhunga rin luh an duh chin ram, khua leh a chhunga chengte leh sawi tur dang awm a piang thla 3 chhungin buatsaih fel turin Mizoram sawrkar kutah mawhphurhna dah a ni tih R. Vanramchhuanga chuan sawiin, "An inbiak atanga thla 2 ral hnuah 20.1.2023 khan Mizoram sawrkarin Home Minister hovin Boundary Committee a ko chauh a, chu committee chuan Mizote luah chin ram leh thil pawimawh dang awm apiang chhui chhuak tur study group din turin rawtna a siam a, mahse vawiin thlengin Mizoram sawrkarin Notification pawh a la tichhuak lo," a ti bawk.