Mizoram hian Assam tih loh kan thenawm state ah buaina kan nei lem lova, mahse Assam nen erawh tunhma atangin buaina kan nei reng a. Kan buaina hi chinfel a har a, state pahnih te an tawlh ve ve anih loh chuan kan buaina hi chinfel mai theih chi a ni lova, kan la buai zel dawn niin a lang.

State pahnih te ramri chungchang a ni emaw thildanga kan buai apianga Assam lamin an tih hmasak ber chu kawngpui dan a ni a, Mizoram hi ei leh bara hrek a, mang-anga min awmtir hi an tum ber a ni. Tunhnai-ah pawh Vairengte daiah buaina a thleng a, Assam lamin an tih hmasak ber chu kawngpui dan chah leh a ni. Tun tum buaina ah phei chuan kawngpui mai ni lovin rel kawng thlengin an tichhia a, Mizoram mipui te hi riltam-in awm mah ila pawi an ti miah lo tihna a ni.

Ramri chungchanga Assam nen kan buaina hi a tawp mai dawn lova, tun aia nasa zawk hian kan la buai zel mai thei. Chuvangin kan chak lakna ber kawngpui dan hmanga min hrekbehna titawp tur hian kawng dang kan zawn a ngai ta a ni. Nikum lama buaina vangin sawrkar chuan Tripura nen kan inkalpawhna kawngpui chu a cheitha a, kawngpui a cheithat hi tun buaina ah pawh kan hmang tangkai ta reng a ni. Tripura lam mai nilo state dang nena kan inkalpawhna kawng te pawh chak zawka cheithat ni se, Assam mamawh lova awm theih dan zawn hram hram a tul ta hle.

Tun dinhmuna pawimawh em em ta chu kan nitin mamawh zualpui chhekkhawlna hmun kan neih ngei ngei a ngai tih hi a ni. Tun buaina ah pawh buaina a chhuah tlai atangin oil control nghal a ni a, nitin mamawh a vang nghal duak mai. Sawrkarin Bairabi a oil chhekkhawlna hmun siam a tum te hi chak zawka kalpui theih nise, hei mai bakah nitin mamawh chhekkhawlna hmun lian leh tha zawk siam theih nise a duhawm hle. Chuti a nih loh chuan Assam tan pawh hian kan zuamawm nghal lutuk a, anmahni tel lova kan nung thei lo nia an hriat tlat avang hian min zuam lehzual niin a lang.

Ramri chungchanga Mizo mipuite tanrualna hi a fakawm tak zet a, political party te pawh lungrual taka kan tanho avang hian Assam min en dan pawh a dang hle ang tih a rintheih a. Kan tanrualna hian rah tha a chhuah ngei a rinawm. Assam nen hian kan buai reng dawn niin a lang a, kan buaina hi intodelh tumna atan leh harhchhuahnan hman ngei tum ang u.