Tunhma atanga Mizoram leh Assam buaina chuan hriat theuh angin a punlun lam a pan zel a ni ber a, buaina liantham chhuah rih ta lo mahse, boruak erawh a la rit hle.  Sipai lam te chuan a theih ang angin hma la bawk mah se, mipui te kan pawi mawh hle a, a bik takin heng buaina thlenna hmuna cheng te kovah thil a innghat thui hle.

Tun hnaiah Assam police lam chuan Mizoram ramri lama kawng sial excavator operator chu kut an thlak mai piah lamah a hnathawhna lirthei chahbi leh Phone an laksak a, na takin kut an thlak bawk. Zirtawp zan lam khan Aitlang lamah bomb a puak a, chumai bakah Phainuam mi leh sa pali chu Assam police ten an man a, court-ah hial hruai an ni. Ramri a Mizote hian a nihna takah chuan Assam lam hi mimal tak hian an ngam hle niin a lang a, an police te pawh hi hlauhna an nei lo tih ngam a ni. Ram himna tur hian tha pawh an thawhhlawk hle.

A nihna takah chuan mipuite huaisenna hi sawrkar lam hian a thlawp zo lo zawk emaw tih mai tur a ni hial a, anni rilru puthmang ang hian kan sawrkar hian hma la phei sela chuan hei ai hian kan buai ngun zawk ang tih a rin theih. Mahse, tharuma in beih hi a hlawhtlinna ber a ni lo tih erawh kan hriat a tul a, thil tha ber pawh a ni lo. Chutihrual chuan chungnung zawk kan nihna tur chuan kan hlauh loh zia hi kan lantir erawh a ngai ve tho si a ni.

Khawi hmunah pawh awm ila, khawi ramah pawh awm ila, sawrkar leh thuneitute an pawimawh rualin mipui te hi kan pawi mawh ber lo thei lo a, ramri-ah ngat phei chuan a chuhna thiam leh a neitu zawk nih tuma tan kan lak a ngai a, chumi tur chuan kan sawrkar pawh hian thiam takin mipui te hi a hmang tangkai ngei a ngai a, an thlavang pawh kan hauh nat hle a tul a ni.

Eng pawh ni se, mipuite hi a sawifel tur kan ni lo a, chutihrualin sawrkar pawh hian ramri chungchangah hian a mi chengte ngaihdan kan lak a ngai a, an duhdan pawh thui taka kan zawm hi a that a rinawm.