Tun hnaiah Mizoram leh Assam te chu ramri buai avangin an inep leh a, Assam lamin Vairengte ram chhunga ngaih Aitlang bawr velah June 30, 2021 Remna Ni takah patrolling rawn neiin, helai bawr vela huanthlai pawh an rawn tichhe nual a, rang takin Mizoram lam pawh police leh sipai te nen an thawkchhuak ve nghal a, helai hmun mai bakah Lailapur lam thleng-in Assam lam police leh sipai te leh Mizoram police leh sipai te chu an inep zui nghal. 

He thil thleng avang hian social media lamah thu leng vak a tam hle a, Mizoram sawrkar demna piah lamah a bik takin police lam demna a nasa hle. Police lam chuan thuthang tam tak hi a dik loh thu pawh an sawi nghe nghe.

Ramri chungchang sawi hi chuan sawrkar lai hian dem an hlawh viau nghal zel a, political party te hian inchirhthehna atan tak an hmang zui bawk a, a tu ber hi nge thiam lo tih pawh hriat mai theih a ni lo. Chutih rualin kan state a sawrkarna chang tawh party te hi chu he thilah hi chuan a tu amah han chapo viau thei tur erawh an awm lovah a ngaih theih.

A nihna taka sawi chuan ramri chungchangah hi chuan khawi state mai pawh hian buaina hi kan nei vek niin a lang a, a chinfelna tak tak hi a awm hlei thei lo ni berin a lang. A hauhna apiang hian neitu chan an chang mai ni hian a ngaih theih a, chuvangin kan tawngkam thlengin kan fimkhur a tul tak zet.

Lockdown chhoh tirh bawr vela Lailapur-a buaina a thlen khan Mizoram lam hian vanneihna chang zawka inngaihna a awm a, khatih lai bawr vela Vairengte lamin an sawi nia an sawi uar tak chu, “Tunhma a kan luah ngai loh thleng thlengin kan chang,” tih ang deuh tawngkam kha a awm. Tun hnaiah kan MLA pakhat pawhin kan ram chin bak luah tawh angin a sawi leh bawk. Heng thil sawi awm te hi a fuh loh theihna a awm tih thleng hian ngaihtuah a ngai a, kan ram chin bak chang anga kan insawina hi Assam media leh national media lam ten tarlang ta chuaih chuaih se, min ram chuhpui chan kan chang thei tlat a ni. 1875-a Mizoram ramri an sawi nen ngaihtuah chuan ram chan nasa tak kan nihna hi sawi uar a tul hle zawk.

Chuvangin ramri chungchangah hi chuan fim taka ngaihtuahin, political party te pawhin inpuh tawn ngawt lova, thu khat vuana, tanrual hi a tul ta tak zet a ni. Social media lama kan thu vawrhdarh tur thleng in fim tak leh thui tak thlir chunga ngaihtuah phawt a tul ta tak zet a ni.