Aizawl: Central PWD in hnathawh tura an ruahman Lawngtlai District Chhotapansury thleng pawh tur kawngpui chu feet 8-a zauin alkatra-a luan zawh tawh a ni a, thawmthat hmabak kawng te chu Sorkar laipuiin BSF hnena sum a pêkchhuah dan azirin la chhunzawm leh tur a ni tih, kawng thawmthatu Central Public Work Department-a Engineer-te chuan an sawi.

Ramri-a rikrum thil thlen thulha tangkai taka hman theih beisei Border Road hian khaw eng emaw zât a paltlang tawh a; Sorkar laipui sum hmanga inkalpawhna kawngpui thawmthat mek hian - Mizoram chhim lam khaw thenkhat Bulungsury, Tippereghat, Madhyasora, Denasora, Letisury, New Khojoysury leh Old Khojoysury-te a paltlang tawh a ni.

Ministry of Home Affairs sum hmanga BSF outpost hrang hrang panna kawngpui hi ramri véngtu sipaite tana thawmthat ni mah se, ramri dep khaw hrang hranga chêngte'n an chhawr tangkai hle a; henglai khaw tam zawk hi inkalpawhna kawngpui thain a thlen phâk loh hlawm avangin, Border Road hi mamawh hrang hrang lama lirtheia veivah na'n an hmang tangkai hle a ni.