Aizawl; Nimin khan I & PR Conference Hall-ah Mizo Students' Union (MSU) buatsaihin Mizoram leh Assam ramri chungchang sawihona Consultation Meeting neih a ni. Meeting ah hian Mizoram-in District Council a neih dawnin Forest Officer pakhatmah a la nei loh thu te, hei vang hian Inner Line Reserve chu Assam Forest in enkawl a dil thu leh, heta tang hian revenue-ah 70% chu Mizo District Council-ah chhunluh a nih thu te, Assam Forest lamin a enkawl nan 30% an chan ve thu te tarlan a ni a. Mizoram-in Union Territory a hmuh hnu-ah revenue hi chhunluh chhunzawm a ni ta lo tih sawiin, hemi chungchangah hian kalkhawmte chuan sorkar chu chak taka hma la tura ngen ni se an ti. Sorkarin ramri chungchanga 'summary findings' bu a chhuahah saptawng hman dik tawk loh avanga thil dik tawk lo awmte chu nakin zela Mizo hnam tana pawi thei a awm avangin, a rang lama siamtha turin sorkar an phût tih an sawi bawk. Ramri chungchang sawihova kalkhawmte hian ramri buai reng chu sorkarin chinfel duhna thinlung pua ruahmanna fel tak neia hma la tura an duh thu sawiin, sorkar leh NGO hmalak zel dan turte an sawiho bawk.