ZALEN Aizawl 31, 2025: Mizoram State Legislative Assembly session-in Myanmar leh Mizoram (India) inrina hung duh lohna resolution a lo pass tawh chu central sawrkarah thlen a ni tawh a. Hetihlai hian central sawrkar chuan state sawrkar rawn chungin ramri hung theih dan tur a zir chiang mek.

August 27-28 chhunga neih assembly session-ah member-te zawhna ziaka chhangin Home Mininister K Sapdanga chuan India-Myanmar ramri hung chungchang chu central sawrkar thuneihna a nih angin central sawrkar chuan Border Guarding Force (Assam Rifles)-te leh state sawrkar-te rawn chungin a hung theih dan tur a zir chiang mek tih a tar lang.

Home minister tar lan danin ramri hung dan tur hi zir chian mek a nih avangin hung tur chin sawi theih a la ni lo a. Ramri hung chungchang chu central sawrkar thuneihna a nih angin central sawrkar chuan Assam Rifles nen ramri hung theih dan tur a zirchiang mek a. Mizoram sawrkar pawhin a ram neitu a nih angin theih angin a tanpui.

Hetihlai hian Mizoram sawrkar ngaihdan erawh 9th Mizoram State Legislative Assembly second session-in February 28, 2024-a resolution a pass leh council of minister meeting, February 28, 2024 chu a la ni reng a ni.

Home Minister K Sapdanga chuan Mizoram Legislative Assembly resolution chu central sawrkarah thlen a ni tawh tih tar lang bawkin, March 8, 2024-ah Secretary General, Lok Sabha Secretariat-ah leh April 3, 2025-ah Deputy Secretary, Ministry of Home Affairs-ah ziaka thlen a nih tawh thu a tar lang bawk.