ZALEN January 24, 2025 : Zo Re-Unification Organisation (ZORO) chuan January 29, 2025 (Nilaini) hian Mizoram khaw hrang hrangah India Sawrkar in Free Movement Rigime (FMR) a thiah chungchang leh India-Myanmar border hung a tum chungchang duhloh lantir nan Sawrkar laipui thupek leh Mizoram Sawrkar thupek an hal a ni dawn tih an sawi. India-in Zofate a nek chep a tum naah an ngai.

Aizawl Press Club-a thuthar lakhawmtute an kawmnaah ZORO chuan, "Central Sawrkar-in Free Movement Regime (FMR) thiat a, Ramri hung (Border fencing) a tum hi a tawp thlengin a do dal zel dawn a. UN Declaration on the Rights of Indigenous Peoples 2007 Article 36(1) ah chuan, 'Tualto hnamte, a bik takin khawvel sawrkar ramri khamin a then darhte chu an inkalpawhin an intanpui ang a, Sakhaw thil leh khawtlang thil, ei leh bar leh politics-ah te anmahni mi leh sa te nen inpawh a, sawiho theihna dikna chanvo an nei a ni. (2) Ram roreltute chuan Tualto hnamte nena inbe rawnin he dikna chanvote hi tipuitling turn hma an la ang.' a ti. He dan pass a nih lai Khan India chuan a duh lamah vote a pe a, tunah erawh a kalh zawngin hma a la mek a ni," an ti.

January 29, 2025 (Nilaini) hian ZORO chuan Free Movement Regime (FMR) thiah duhlohna leh India-Myanmar border hung tum duh loh lantir nan sawrkar laipui order leh Mizoram sawrkar thupek a hal dawn a, Aizawl-ah chuan Vanapa Hall kawt-ah Sawrkar thupek halna hun hi hman tura ruahman a ni a. Mizoram chhung District khawpui hrang hrangah he hun hi hman tum a ni bawk a, Mizoram chhunga khua leh vengte FMR thiah leh ramri hung duh lohna hi lo zawm ve a, Sawrkar order halna hun hi lo huaihawt turin ZORO chuan a ngen a. ZORO-in FMR thiahna sawrkar order halna a neih turah hian Zoram mipuite ram leh hnam tan a ni tih hria a, tel vek turin an sawm. "Kan tanrual phawt chuan kan hlawhtling ngei ang," an ti.

Zo-Re-Unification Organisation (ZORO) Vice President L. Ramdinliana Renthlei chuan Aizawl Press Club ah thuthar lakhawmtutr kawmin Zoram mipui tam tak hian Zo Re-Unification Organisation (ZORO) hi Political party emaw ti te, ZORO hian enge kan tih hre lo an awm tih sawiin ZORO hi Political Party a ni lo a, Khawvel hmun hrang hranga awm Zofate kan insuikhawm a, lungrual taka kan awm a, rorelna pakhat hnuaia kan awm lehna tura bei tute annih thu an sawi.