June 10-14, 2021 inkar khan misual 4 te chu Dampa Tiger Reserve chhungah lut ruin Ramsial, Hauhuk leh Sazuk te an kap a, dan phal lohva ramsa chi hrang hrang kaptu Chakma 4 te chu Mamit District Court chuan thubuai siamsakin IPC Section dan thenkhat leh Wildlife Protection Act, 1972 leh Arm Act 1959 dan hnuaiah te case siamin Mamit District Jail-ah dah luh an ni.

Mizoramin ramsa humhalhna kan neih that ber zinga mi Dampa tiger reserve area chhunga hetiang thil a thleng hian ngaihtuah a ti thui hle, mipui ten ramsa leh nungcha te kan humhalh laia hetianga sa pel duh an la awm fo mai hi thil pawi tak a ni. Dampa tiger reserve hi sawrkar laipui pawhin a hriat tham a ni a, nungcha humhalhna hmun zau tak a niin ramsa te zalen zawka an nun theihna turin India leh Bangladesh ramri hungna ah pawh hung tel ve loh zinga mi a ni hial. Hei mai ni lovin ramsa humhalhna ah hian sakei a awm leh awm loh chungchangah inhnialna hun engemaw chen a awm a, mahse tunhnaiah sakei thlalak hmuh a niin sakei pawh a awm ngei tih finfiah a ni tawh a ni. Chuvangin he reserve pawh hi a pawimawhin a hlu lehzual sawt a ni.

Kan pi leh pute hunlai chuan sa kap thei kha an ngaihsan a ni a, mahse hun inthlak danglam zelah ramsa leh nungcha humhalh a pawimawh zia kan hrethar zel a. Sawrkar mai bakah mi tlawmngai te rawn penchhuakin ASEP leh mi dang dang te hnathawh avangin nungcha humhalh a pawimawh zia kan hre thar zel a. Hei hian rah tha chhuahin tunhma lama kan rilru put hmang thlakin tunah chuan nungchate chu 'ti na lovin kan duat ta zawk' a ni.

Dampa tiger reserve a thilthleng hian nungcha humhalh kawngah tanlak a la ngaihzia chiang takin a lantir a. Forest department leh tlawmngai pawl ten reserve area chhehvelah nungcha humhalh pawimawhzia inzirtirna an neih thar a tulzia a lantir niin a lang. Khawpui lamah hi chuan kan ziaawm deuha a lan laiin a bikin thingtlang lamah tanlak a la ngai hle tih a lantir bawk.

Tunhnaia Dampa tiger reserve area a thilthleng hi min bengharhtu leh nungcha humhalh kawnga tan min lak thar tirtu ni thei se a duhawm hle a, pawi khawihtute pawh hi an phutawk ang ngeiin hremna pek ni se. Hei hian nakin zelah pawh pawikhawihtu te a ti tim ang a, midangte tan pawh inzirna tha tak a ni ngei ang.