ZALEN, Jan. 11, 2025: Mizo badminton hriat hlawh ni chho mek, C. Lalramsanga chuan tun season kal lai mekah medal 13 a la ta a. Nilaini khan Yonex-Sunrise All India Junior Ranking Badminton Tournament 2025-a bronze medal a la leh.

Durtlang tlangval hi January 3 atanga Hyderabad-a khelh tan tournament-ah hian boy’s doubles-ah Bjorn Jaison nen tang dunin bronze medal hi an vaw chhuak.

Jaison-a nen hian Seeded No. 8 niin inelna hi an hmachhawn a, round hmasa lam awl theih phahin round of 32 atangin bul an tan a. An khelh hmasak berah Divyam Kejriwal leh Bapun Rout te inkawp chu 21-14, 21-16-in an hneh a. Round dawt lehah Mizo rawlthar tho, Malsawmhlua leh Amarjit Singh Khwairakpam te tangdun chu 21-12, 21-17-in an hneh zui. 

Quarter final-ah Seeded No. 3 Niranjaan G.N leh Vishvajit Raj LVN te inkawp hmachhawnin deciding game-ah 20-22, 21-15, 21-11-in an hneh leh a. Semi final-ah hian Seeded No. 1 Bhavya Chhabra leh Param Choudhary te lakah 15-21, 24-26-in an tlawm ta a ni.

He tournament-ah hian Ramsanga hi category hniha tel tur a ni a, top seed an nihna, mixed doubles-ah a kawppui tur a inhliam avangin boy’s doubles-ah chauh a inlan a ni.

Tun season kal mekah Mission Veng Badminton Club-a khel mek, Ramsanga hi a che tha hle a, international level-ah bronze medal pali, national level-ah gold medal pahnih leh bronze medal pathum a la ta a. Northeast India level-ah gold leh silver pakhat ve ve a vaw chhuak tawh a, state championship-ah gold leh silver medal pakhat ve ve a hlawhchhuak tawh bawk.

Nilainia khelh zawh tak, Hyderabad tournament-ah vek hian Lalrempuii leh Tanoo Chandra te chuan girl’s doubles-ah round of 8 an thleng a. Sainunmawia Sailo leh Ishita Negi te pawhin mixed doubles-ah round of 16 an invaw kai bawk.

Anni bakah hian Mizo player eng emaw zatin main draw an thleng bawk.

Mizoram Badminton Association (MBA) chuan Ramsanga leh Mizoram badminton player dangte chawimawina sang zawk dawng zel turin duhsakna sang ber a hlan.