Ranji Trophy 2023-24 khelh mekah Mizoram chuan hnehna an chang ve ta a, Pathianni khan Arunachal Pradesh chu wicket riatin an hneh a, an group atanga semifinal lut thei dinhmunah an ding mek.

Lal Bahadur Shastri Stadium, Anand, Gujarat-a Zirtawpni atanga Plate Group inkhel vawi thumnaah hian Mizoram tan fast bowler Mohit Jangra leh off spinner KC Cariappa te an langsar dun hle.

Thum vawrah Arunachal Pradesh vanneiin vuak hmasak an thlang a, batter pathum laiin half century siam thei mah se Jangra leh Cariappa an ngam lo va. Jangra hian wicket ruk zet lain Cariappa hian mi pathum a vawm hlum bawk a, run 265 siamin Arunachal Pradesh an thi vek.

Mizoramin vaw zuiin Agni Chopra chuan run 114 a siam a, a vuak lamah Cariappa bawk thawhhlawk lehin run 74 a siam bawk a. Anni bakah hian tual chhung player Vikash Kumar (run 58) leh captain Lalhruaimawia Ralte (run 25) leh Mizo Cricketer of the Year Joseph Lalthankhuma (run 24) ten an pui nual bawk a, run 323 an tlin thei.

Thawh (innings) hnihnaah run 58-a hnufual chungin Arunachal Pradesh hian an vuak chhunzawm a, thawh khatna ang bawkin Jangra leh Cariappa an ngam lo lehpek a, mi panga ve ve vawm hlumin run 134 chiah an tlin thei a. Vawi hnih vuakah Mizoram tan chak nan run 80 chauh an tuk thei.

Mizoram hian chak beisei taka vuak thawh hnihna bul tan mah se opener pakhat zawk run siam lovin a thi a; mahse, Lalhruaizela’n a tawp thlenga damin run 39 a tlin a, Kumar pawhin thi lovin run 26 a siam ve bawk a, mi pahnih chauh thiin chak nana an mamawh an tlin thei a ni.

Ranji Trophy-ah hian Mizoram hi Plate Group-ah state/association dang panga nen an awmho va. Inkhel kualin a sang paliin semifinal an lut thei dawn a. Point kua nei tawhin palina dinhmun an hauh mek a, khelh hnih an la hmabak.

Zirtawpni atang hian Lal Bahadur Shastri Stadium, Anand, Gujarat-ah tho khelh thuma vawi hnih chak tawh, pahnihna dinhmun luah mektu, Meghalaya nen an inhmachhawn leh dawn ang.

Board of Control for Cricket (BCCI)-in state/association tana kum tin a buatsaih thin, Ranji Trophy hi first-class championship-ah chuan ngaihhlut hlawh ber a ni a, kum 1934 atanga khelh tan kha a ni.

Kuminah hian Elite-ah group paliah team pakua theuh awmin Plate-ah Mizoram leh mi dang panga an awm a. Plate-a final lut team hnih chu season tharah Elite-ah an kai sang dawn a, kumina Elite-a awm zinga a tichhe ber team hnihte chu Plate-ah an tlahniam ve thung ang.

Group stage inkhel hi innings hnihin ni li chhunga khelh zawh tura ruahman a ni a. Knock-out stage atangin ni nga chhunga khelh a ni ang.