India rama tual chhung cricket inelna ngaihhlut hlawh ber, Ranji Trophy-ah Mizoram chuan Thawhtanni khan Meghalaya chu run 191-a hnehin Plate Group-ah khelh khat la bak chungin semifinal an lut.

Plate Group-ah association paruk awmin khelh nga khelh turah khelh li theuh an khel tawh a. Mizoram hian vawi hnih hnehna changa vawi khat hnehtawk neiin point 15 an nei tawh a, pahnihna dinhmun an hauh mek.

A group-a a sang paliin semifinal an lut thei dawn a, pangana leh paruknaa awmten khelh hmabak vawi khat an la neih atangin point hmuh theih sang ber (point sarih) pawh hmu mah sela Mizoram hi an umphak thei tawh dawn chuang lo.

Lal Bahadur Shastri Stadium, Anand, Gujarat-a group stage inkhel vawi lina hi Zirtawpni atanga khelh tan niin Mizoram hian Meghalaya lakah thumvawrah chakin vuak hmasak an thlang a, an tifuh.

Thawh (innings) hnih an thawhah Mizoram tan Agni Chopra chuan century a siam ve ve a, an chakpui a tih theih.

Innings khatnaah hian Chopra (run 105) bakah Lalhruaizela (run 57) leh Vikash Kumar (run 67) te an che tha bawk a, run 359 siamin an thi zo.

Meghalaya vuak tumin opener RR Biswa (run 125) che tha mah se mi dangin an pui tha lo va, Mizoram bowler KC Cariappa (wicket ruk) leh Mohit Jangra (wicket li) te an ngam lo bawk a, run 281 tlinin an thi zo ve thung.

Mizoramin a thawh hnih nan run 78-a hma hruai sa chungin an vuak chhunzawm a, Chopra (run 101) a chet that leh bakah opener Jehu Anderson chuan half century vaw chhuakin run 51-in a thlawp bawk a. Run 237 siama mi pakua an thihin an duhtawk (declare) a, thenawm state tan chak turin run 316 siam tur an tuksak.

Meghalaya hian an hmabak hautak puitlin an tumna kawngah an tum angin an che thei lo va, innings hmasaa century vaw chhuaktu opener Biswa chu run siam lovin Jangra-a’n a vawm hlum nghal a, an talbuai zui.

A vaw chhuak hnem ber, Bonchang Sangma pawhin run 26 chauh a tlin thei a, run 124 chauh an siam tihin an thi zo va, Mizoram hi run 191 zeta chakin point ruk an hmuh belh a, semifinal an inhlang kai thei ta a ni.

Mizoramin an vawm tum hnihnaah hian Cariappa chuan mi pali vawm hlumin Cricket Association of Mizoram (CAM) Player of the Year ni lai, Joseph Lalthankhuma’n wicket thum a la a, Jangra-a’n pahnih a vawm hlum bawk.

Mizoram hian group stage inkhel hnuhnung berah a group-a sang ber, Hyderabad chu Hyderabad-ah Zirtawpni atang hian an hmachhawn leh dawn a ni.

Ranji Trophy hi Board of Control for Cricket in India (BCCI)-in kum tin state/association inel nana a buasaih, first class tournament a ni a. Elite leh Plate-a then niin tun season-a Plate Group-a final lut pahnihin season lehah Elite Group an lut ang.

Group stage inkhel vawi khat hi ni li chhunga khelh tura ruahman niin innings hniha khelh a ni a, semifinal atang hian ni nga chhung khelh tur a ni.