ZALEN, Oct. 21, 2024: India rama cricket-a tual chhung inelnaa ngaihhlut hlawh leh dah san, mipa senior team inelna, Ranji Trophy-ah Mizoram chuan Thawhtanni khan Arunachal Pradesh chu run 267-in an hneh.

Gujarat College Cricket Ground ‘A’, Ahmedabad-a inkhelah hian Mizoram hi thumvawrah chakin vuak hmasak an thlang a, thawh khatna (1st innings)-ah run 247 an siam a, state pawn atanga lak luh (guest player) Agni Chopra chuan run 110 siamin Cricket Association of Mizoram (CAM) Men’s Cricketer of the Year ni lai, Vikash Kumar chuan runs 53 a thawh bawk. 

Arunachal Pradesh-in an vuak thawh khatnaah run 252 an siam ve thung a. Mizoram all rounder Joseph Lalthankhuma chuan batter pali lai a vawm hlum.

Thawh hnihnaah Chopra leh a vawm lama thawhhlawk, Ramhlun Venglai player Joseph-a te bawk che tha lehin guest player hian run 238 zet a vaw chhuak a, Joseph-a’n run 128 thawh bawkin a tawp thlengin an dam.

Joseph-a leh Chopra te pahnih inkawp hian run 384 zet thawk chhuakin Mizoramin mi pahnih inkawp (partnership)-a run an vuak chhuah tam ber record a ni nghal a. Thawh hniha century siam ve vetu, Chopa hi pha takin Man of the Match atan thlan zui a ni nghe nghe.

Thawh hnihnaah hian run 404 tlina mi pahnih chauh an thih laia vuak duhtawk (declare) zuiin thawh hmasa nena an siam nen chak tura umphak tur hna hautak tak, run 399 an tuk.

Arunachal Pradesh hian chak an mamawh run tam tak umin a vawi hnih nan an vua a, mi mala run 35 siam tling pawh awm lovin run 132 an siamin an thi zo va, Mizoram chuan run 267 zetin hnehna an chang ta a ni.

Arunachal Pradesh vuak vawi hnihnaah hian Mizoram tan captain Bobby Zothansanga, Chaltlang leh guest player tho, KC Cariappa ten wicket li ve ve an la. 

Kum 1934–35 atang daih tawha khelh tan, Ranji Trophy hi ni khat aia rei khelh ngai (multi day match) a ni a, Board of Control for Cricket in India (BCCI)-in a buatsaih tournament-ah chuan ngaihhlut hlawh ber a ni.

Tun season-ah hian Mizoram hi Plate Group-ah awmin an vawi khat khelhnaah Sikkim lakah run 137-in an lo tlawm tawh a, a vawi hnihnaah khat an chak ta a. Inrinni atang hian Manipur nen an khel leh ang a. Goa leh Nagaland an la hmachhawn leh bawk ang.

Plate bakah Elite Group pali an awm a, inelna hi a hranga kalpui niin Plate-a awm state/association paruk hi an inkhelh kual hnuah a sang paliin semifinal an khel ang.

Mizoram team-in hnehna an chang hi CAM chuan a ngaihlu thu a sawi a, an khelh leh zel turah duhsakna an hlan nghal bawk.