Tun hmaa Mizoten kan hmelhriat ngai lem loh; mahse, tun hnai thihna thlentu rannung seh ‘scrub typhus’ vangin tunhnaiah Mizoram khaw thenkhatah thihna a thleng a. Doctor-te chuan thihna a thlen chhan chu ‘damdawiin panpui har vang’ a ni tlangpui niin an sawi. Scrub Typhus vang hian Haulawng, Pangzawl, Phullen, Thenzawl leh Sawleng khua chuan harsatna an tawk nasa zual a. Tun hnaiah Sawleng khuaah hian he natna vang nia hriatah mi pahnih RD Lalfakzeli (11) leh Thangzalala (45) te chu an boral. Sawleng YMA hruaitute chuan rannung seh vanga boral an awm tawh lo nia sawiin an test-naa an hmuh chhuah khawsik te chu an la awm a, mahse nasa leh ngaihtuahawm chu an awm lem lo niin Zalen an hrilh. Health department hnuaia natna lam buaipuitu Integrated Disease Surveillance Program (IDSP) hotute chuan khawsik neite chu a rang thei ang berin damdawi inah inentir se an duh tih sawiin enkawl vat a nih chuan tihdam a awlssam niin an sawi a. Tuna an thihpui chhan chu enkawlna dawn tlai vang leh ngihthah vang a ni tlangpui nia sawiin scrub typhus test-na leh enkawlna tur chu NEDP sum atanga hmuh thuai an beisei niin an sawi bawk. Thuchhuah an siamah Health department chuan scrub typhus chuan Mizoramah bu a khuar nghet tawh hle a ni tiin kum 2012 atanga July 2018 thla tir thleng khan he natna vei mi 1710 hmuh chhuah a ni tawhin vanduaithlak takin mi 41 an thi tawh niin an sawi a. Scrub Typhus hrik hian sazu-ah bu an khuar a, sazu atang hian tuhrikin la chhawng ve lehin mihringin kan lo kai ta thin tih an sawi a. Mi tinte mahni in leh a vel fai taka vawng a, sazu leh tuhrikte tana chettlatna remchang siamsak lo tur te, a hluarna hmun bikah phei chuan daivah leh ram kal ilovah thawmhnaw phui tha tak hak a, rannung duh loh odomos ointment te inchulh a, hnathawh zawh apianga sahbawn nen fai taka inbual thin turin mipuite an chah a bawk a ni.&&&&&