Aizawl; Animal Husbandry & Veterinary Minister C Ngunlianchunga chuan, nitin khawsaknaah ran kan mamawh viau laiin an hamthatna leh enkawlna lam erawh chu Mizoten an ngaihthah niin a sawi a. "Hmangaih letna a awm lo thin a, hei hi pawi ka ti hle a ni," a ti. He thu hi nimina Tourist Lodge, Chaltlang-a 'World Veterinary Day' hmanna inkhawmah sawiin Vety Minister chuan, ranvulh chu Mizo nuna bet tlat, sakhuana leh thiltihna dangah pawh ran tello chuan hun hman harsa tak a nih thu a sawi a.Ran atanga natna awm theite inhrilhhriat leh zirtir kawngah Vety thawktute chu tan la lehzual tura chahin, hrisel zawka ranvulh nan leh ran vulhtute pawhin hriselna an neih theih nan Medical Doctor te nen inrawn tlanga hmala thin tur leh dawhkan maia hun hmang lova, an chenna hmun ngeia ran endik thin turin a chah bawk. World Veterinary Day hi Mizoram State Veterinary Council leh Indian Veterinary Council te bultumin hman a ni a, inkhawm hi Dr.. R Kapthuama, MSVC President-in kaihruaiin Dr. Engkunga Chhangte chuan mihring natna 60% chu ran atanga kai a ni tih a sawi a. Ran enkawl kawngah fimkhur a ngaih thu a sawi a. Ran atanga natna inkaichhawntheih thleng avangin khawvel hmun hrang hrangah hrileng eng emaw zat a awm tawh niin a sawi bawk. Kumin World Veterinary Day thupui atan hian Animal Health 'Ranvulhte Hamthatna' tih chu thlan a ni. World Veterinary Day hi kum 2000 atang khan hman tan a ni a, kumtin April Inrinni hnuhnung ber hi he ni bik atan ruat a ni.