Ghana striker kum 28 mi, Raphael Dwamena chu Albanian league-a an inkhelh laia tluin a thi.

Dwamena-a hi Inrinni zana Egnatia tana Partizani a hmachhawn tumin a thi a ni.

“Specialist doctor-ten buaipui nghal mah se vanduaithlak takin a kal ta a ni,” tiin Albanian Football Federation (AFL) chuan thu an chhuah.

Dwamena hi tun season-a Albanian league-a goal thun tam ber ni mekin goal kua a thun a. Ram tan pawh vawi kua a khelh tawhah goal hnih a thun tawh bawk.

Inrinnia an inkhel chu tihtawp nghal a ni a, federation pawhin tun kara Albania-a inkhel tura ruahman awm tawhte a thulhtir nghal vek bawk.

“AFL chuan Albania football chhungkaw nghawngtu thil thlengah hian Dwamena chhungkua leh Egnatia club a tawrhpui tak zet a ni,” tiin an thuchhuahah an tar lang bawk.

Ghana Football Association (GFA) pawhin ‘hun harsa an tawhah hian an chhungkua kan tawrhpui tak zet’ an ti ve bawk.

“A ram tan theihtawp chhuahin Ghana tana a inlan apiangin a theihna sang ber a lantir thin,” tiin GFA president Kurt Edwin Simeon Okraku chuan a sawi bawk.

Dwamena hi kum 2017 khan £ maktaduai 14-in Brighton chuan lak luh an tum a; mahse, medical endikna a paltlang zo lo va. La Liga-ah kalin Levante-ah a khel a, loan-in Real Zaragoza-ah a khel tawh bawk.

Kum 2021 khan Austria-a Blau-Weiss Linz tan a khelh laiin cup inchuhnaah Hartberg an hmachhawn tumin a lo tlu tawh bawk a; mahse, hemi tum hian dam chhuakin a inkhel zui leh thei.

A lung zaisak niin automatic defibrillator an vuahsak nia sawi a ni.

“An hun harsaah hian a chhungte leh a thiante kan hre reng a, kan club-a a hnuhmate hi hriat reng a ni tawh ang,” tiin Levante chuan social media-ah an tar lang.

Zaragoza pawhin thlahin, “Kan player hlui, Raphael Dwamena-a’n min kalsan tih kan hriat hi pawi kan ti a, Zaragoza tantute thinlungah a riak reng tawh ang. Rest in peace,” an ti ve bawk.