Leeds United chuan an player duh lai Raphinha an lei chhuak duh a nih chuan a lo berah £55million tal club-ah pek an ngaih tur thu Barcelona an hrilh hmiah. Leeds player hi Barcelona lam hian £21million bawr vela lak theih an in beisei thung. 

Season liam ta khan match hnuhnung berah Leeds hian Brentford chu beisei loh takin 2-1 in an hneh a, season thar a Premier League khel turin an in ham tan theih phah. Leeds chakna hnar pakhat Brazilian chu Catalan lamin lo hmu taiin lei theih an inbeisei a, mahse Leeds lam hian an player hi a man an chhiar sang hle thung. 

West Yorkshire club ten Premier League an khelh phak leh tak si-ah chuan, Catalan palian lam pawh hian an beisei aia tovin Brazilian hi an lak a ngaih phah dawn a nih hmel. Leeds hian an player hi an hralh chhuak dawn a nih chuan duh dan pahnih an nei a, pakhatna chu a man an chhiar zat angin an lei ngei tur a ni. Pahnihna thung chu a man hi instalment a pek a rem dawn lo bawk. 

Sum harsatna vanga talbuai Barcelona hian an player duh em em Bayern Munich duhlai Robert Lewandowski lei chhuah an tumna kawngah pawh sum chungchangah buaina an tawk mek a ni. Lewandowski hian Bayern Munich chhuahsan a duh thu a sawi lang fo tawh a, mahse a chhuak a nih pawhin club pakhat chiah zawm a duh a, chu club chu Barcelona a ni. Mahse, German club atanga Lewandowski lei chhuak tur hian sum tam tak sen a ngaih dawn avangin, amah duh em emtu Barca lam hian harsatna an tawk mek a ni. 

Raphinha pawh hian a duhthusamah chuan Champions League khel phak club a khelh a duh a, Leeds lam erawhin an dam khawchhuah nan an mamawh em em thung si.