Aizawl: Health & Family Welfare department hnuaia Food & Drug (F&D) hotute chuan ZALEN zawhna chhangin Mizoram sangha te ah dan phal loh vawnthatna Formalin a awm leh awm loh an test chhunzawm rih lo niin an sawi a, hetih lai hian hmun leh hmuna test chilh a, a result hmuh theih nghalna Rapid Testing kit an chah mek chu alo thleng tep niin an sawi bawk. Rapid Testing kit hi Guwahati-a awm Zenith India Limited atangin an lo chah tawh a. Tunah hian test kit hian Guwahati a thleng tawh niin F&D hotute chuan an sawi. Guwahati-a chah nimahse Zenith India Ltd. te hian hmundanga mi an chah veleh chhawn avangin hun a duh rei tih sawiin F&D hotute chuan “State dangte pawhin an chah a, Meghalaya chuan an dawng tawh a, Mizoramah pawh tunkar chhoah chuan a lo thlen theih mai kan ring,” an ti. Rapid testing kit hi 2 chah niin pakhat hi vawi 100 test theihna tur a ni a, pakhat man hi Rs. 25,693 a ni. A lo thlen hunah chuan bazarah kalin test chilh a ni ang a, hmun leh hmunah result a hriat theih nghal dawn a ni. State lian dangte pawhin hetiang hi an hman tlangpui thu leh laboratory a test chuan hun a duh rei thu F&D chuan an sawi bawk. Rapid Testing kit hi mamawh dan azir leh district danga mi tur te nen chah belh zel turin F&D chuan ruahmanna an siam. Food Testing Laboratory, Zemabawka kar hmasaa result an hmuhah chuan Formalin pakhat mah hmuh a ni lo tih sawiin F&D hotute chuan, “High Performance Liquid Chromatography (HPLC) hmanga test a ni a, test changkang leh rintlak tak a ni,” an ti a. Tun hnaiah test leh tumna an neih loh thu leh test dawn pawh ni se sangha a thlen rih loh thu ZALEN an hrilh. Thudawn danin tun hnaiah Assam leh Meghalaya-ah Formalin telna sangha hmuh chhuah a ni leh a, Guwahati bikah hian hmun hrang hranga mi sangha 6 an lakkhawma 1-ah hmuh a ni a, 5 ah hmuh a ni lo ve thung.