Tun season tharah hian player khel tha tak tak an chhuak thar a, November thla tawp ni 29 a puan chhuah tur Ballon d'Or shortlist-ah player tha 30 hming langsar tak tak tar chhuah an ni bawk. Heng player hming tar chhuah te hi football sumdawnna khawvela hralh tla ber ber tur an ni a, rating thara player tha thlan chhuah pawh vote hmu tam zinga tel tura ngaih an ni. 

Kum 2008 daih tawh atanga hming langsar pahnih Lionel Messi leh Cristiano Ronaldo te pawh Ballon d'Or-ah hi chuan hming langsar pawl an ni a, tun dinhmuna player tha 5 zingah erawh an tel ve ta lo thung. Kum 2019-a Luka Modric-a a rawn lang ve zawk tih loh chu anni pahnih hian he chawimawina nopui hi thangkhat lian zet an insem a ni. 

Tun tuma player ranking an siam dan hi tun season chhunga an chet nat dan en chunga siam a ni deuh ber bawk. Tun dinhmuna player tha panga an thlan chhuah te chu:

#5 Robert Lewandowski (8.00)FC Bayern 

Season liam ta chhunga competition hrang hranga Bayern Munich tana goal 48 zet khungtu Robert Lewandowski hian 2021-22 season hian nikum lama a goal thun zat a khum thei mai ang tih khawpin a che tha leh mek. 

Bundesliga match sarih a khelh tawhah goal sarih a khung leh der tawh a, UEFA Champions League-ah goal li thun leh tawhin DFL-Supercup, Borussia Dortmund nen an khelhah goal; hnih thun bawkin match 10 a khelh-ah goal 13 lai a thun leh der tawh. Goal thun mai bakah Polish striker hian a thiante goal thun tur ala siam sak thin bawk. 

WhoScored rating-a pangana hauhtu kum 33 mi Lewandowski hi mi tam tak chuan kumin Ballon d'Or award dawng thei turah an ngai. 

#4 Dimitri Payet (8.03)

Dimitri Payet hi a club Marseille tan tun season-ah league match tum nga chiah ala khel a, tunah Marseille hi table-ah palina an la ni mek bawk. Hliam-in a bawh buai Marseille captain hian league match vawi nga a khelhah tum nga a pet goal tawh a, assist a nei bawk. Tun season-ah Marseille hian Payet-a hova an khelhah tlawm an la nei lo. 

A chawn bawr na vangin Payet hi a team tan a thahnem thei rih vak lova, league-a FC Lorient an tum turah pawh a inlan loh rin a ni. 

#3 Mohamed Salah (8.21)

Footballer hranghlui leh pundit thenkhat chuan Mohamed Salah hi tun dinhmunah chuan khawvel player tha berah an chhal. Lionel Messi, Cristiano Ronaldo leh Robert Lewandowski te aiin an dah sang a ni. Chuti chungin WhoScored lam chuan Salah hi khawvel player tha ber pathumnaah an la rin lut hram.

Liverpool forward hian season bul a tan tha hle a, tun dinhmunah competition hrang hrangah goal 10 zet khung tling leh der tawhin goal sarih thungin Premier League top goal-scorer a ni mek bawk. Hei bakah hian assist pali neiin Premier League player zinga he list a tel awmchhun a ni bawk. Premier League player atanga WhoScored rating-a pahnihna hauhtu chu West Ham United player Michail Antonio niin rating point 7.84 a hmu a ni. Contract hmang zo tawh mai tur kum 29 mi Salah hi a chetha chho zel a nih chuan Liverpool hian an hum zo lo maithei. Achhan pawh club hausa Real Madrid leh Paris Saint-Germain lamin an hmu tai rih riau. 

#2 Karim Benzema (8.37)RCD 

Ballon d'Or dawng thei tur zinga hming langsar ber pakhat Karim Benzema hian 2021-22 season bul a tan tha hle a. Cristiano Ronaldo an Real a chhuahsan hnua goal thun kawnga a ai awhtu Frenchpa hian a club tan a thawh hlawk thei hle.

Competition hrang hrang 10 a khelh tawhah Benzama hian goal 10 thun tawhin assist pasarih ngawt a nei bawk. Tunah hian La Liga lamah top-scorer ni mekin goal kua zet a khung tawh a, pahnihna hauhtu Mikel Oyarzabal hian tun dinhmunah goal thum chiah a la thun. Benzema hi league lamah assist pasarih neiin assist ngah ber a ni bawk a, midang goal siam sak kawnga thawh hlawk player dangte aiin assist pali ngawtin a ngah bawk. 

Kum 33 mi chet that dan en hi chuan pakhatna ni awm a mawi a ni a, Ballon d'Or sem turah pawh hian dinhmun sang tak a din ngei rin a ni.

#1 Erling Haaland (8.48)

WhoScored rating lamin list-a pakhatnaa an dah hi tu dang nilovin Borussia Dortmund star Erling Haaland a ni. Norwegian hian a khelh mekna Dortmund mai ni lo, European football hi a chhem nghing rih a ni ber. Dortmund tan game 68 a inlanah goal 70 a thun thei a ni. Tun season-ah kum 21 mi Haaland hian a club tan goal 13 khung tawhin an league-ah top-scorer dinhmun a hauh mek. 

Europe-a league lian zual panga player zingah Haaland hian game tinah shot a ngah ber bawk a, Red Bull Salzburg striker hlui hian game a khelh apiangin vawi nga shot nei ziah ang a ni. Lewandowski an pahnihna hauhin game tina shot 1.6 nei anga chhut a ni thung.