C. Sangzuala

Kum eng emaw ti kal taah khan Mizoram sawrkara Supply Dept-a Store Keeper pawlin an magazine (Annual nge, eng ber nge tih ka hre ta lo)-ah ka thil vei zawng ziak ve turin min rawn sawm hlauh mai a. Insit mah ila ka pha phal lo. Vai buhfai ei reng mai han nih hi Zo buhfaia thlak ve tawh tul ka ti hle thin a. Chuvangin Zoram thar chhuah buhfai ration-a sem ve tawh rawtna ka ziak a ni.

Kha Magazine/Souvenir kha buhfai semtu Department-a peng pakhat an ni mai a,buh thlawh chhuah lam thawktu an ni lo va,chu lama mawhphurtu Agriculture Department-a hotuten an lo chhiar ve khiat em tih hriat zuina pawh ka nei hran lo. Thuziak chhiar tuipui hrim hrim chi mi pahnih / pathum hnen atang chuan min faksakna ka dawng mial a, a lawmawm tho na a, ka ziahna rilru lam erawh a hawi lem lo.Ni tin chanchinbua chhuah ni se khak fuh palh mual mual pawh a nei khiat thei e.

Ei leh bara intodelh pawimawh thu hi ram hruaitute ka atanga kan hriatna a rei tawh hle a, political party hrang hrang kan ram sawrkarna lo chelh tawhten programme liana an neih thin pawh hi chu mi tinzawn chu ni thinin a hriat a. Chuti chung chuan vawiin thleng hian kan chaw pui ber buhah pawh kan la intodelh si lo, a hahthlak viau mai.

Tuna kan ram Sawrkar kal tan meka kan Agriculture Minister zahawm tak chuan ‘ei leh bara intodelh’ ti tlangpui mai lovin ‘Mizoram tharchhuah buhfai rationa sem ‘ tih a rawn sawi chhuak ta rawt a, dawnsawn a nuam hle. Chumi hnuah chutiang lam hawi chu kan Senior Minister pakhat leh kan Chief Minister zahawm takin an rawn sawi chhunzawm bawk a. Tun hnaiah Supply changtu Minister ngeiin a rawn sawi veleh tak ah phei chuan Zoram buhfai sem hun a hnai kuarin a hriat a lawm le!

Buh thar theihna bik kan leilung neih dan, Statistical Handbook leh chanchinbu a kan hmuh dan tlangpui ilo en teh ang.

Leileta siam theih hi hectare 75,000 vel a ni a, siam tawh hi hectare 20,000 vela sawi a ni. Ram hectare 1 hi mizopa buh tin 2½ hmun vela zau a ni a. Leileta siam tawh hi tin 50,000 hmun vel a ni ang a,la siam loh hectare 55,000 chu Mizopa buh china tin 1,37,500 hmun tia vel a ni thei ang. Leileta siam theih hi siam ni ta vek sela buh quintal 1,87,500 a thar thei dawn a ni. Heng bakah hian awihtlan ram rem buatsaih theih hectare 7644-a zau a la awm bawk (Zalen 26/3/17).

Chanchinbute atanga kan hmuh dan chuan Mizoramah hian leilet nei chhungkua 10,681 an awm a - (Vanglaini 2/5/19). Anniho hi leilet siam tawh sa neituah ngai ta ngawt i la. Mizoramin state dang atanga thla tina buhfai kan lak luh hi quintal 1100 a ni – (Zalen 30/6/18). Tunah chuan a pung deuh tawh mai thei e. Thingtlang lamah Mizo lo neih pangngaia eizawng chhungkaw 60,688 vel awma sawi an ni a, thla thum ei tharah ngai ta ila – (Zozam Times 4/6/19). Khawpuiah te hian buh thar ve lo thahnem fe an awm bawk ang. Kan chawhmeh-thlai lam chi pawh hi chiang deuha chhinchhiah ni thei se tan lak dan tur a hriat theih deuh ngei ang. The Zozam Times–in a sawi dan chuan January – June’ 2019 chhunga Vairengte check gate – a chawhmeh lo lut a zat hriat theih chin chu quintal 11 chuang tih a ni. Myanmar atang pawhin thahnem fe lo lutin a sawi bawk a – (12/7/19). Aizawl khawpui chhehvel leh khaw hla deuh zawk atanga mizo thlai thar khawpui bazara lo lut thin pawh hi chhinchhiah fel ni ta se thahnem fe tur chu a ni.

Ei leh bar lam chi ni lo, mi taimaten thahnemngai taka an lo beih tuna teak kung puitling tawh te hi thil dang anga suma chantir theih ni se thatpui tham a ni ngei ang. Rubber (Thelret) pawh hi chhungkaw eng emaw zat chuan an chingin an lo enkawl tauh tauh va, tunah hian kung nuai 10 lai a awm tawh a, chhungkaw 300 chuan an hnai ve tawh a ni awm e – (Mizo Aw 30/5/19).

Kan ram leilung hi thlai chi tin chin theihna a nih thu kan hruaituten min hrilh awl lo va, a thlamuanthlak viau. Amaherawh chu ram hmasawnna atana rahbi pawimawh hmasa chu ei leh bara intodelh phawt hi a ni an ti thin. Kan chaw pui ber BUH mawlh mai hi kan ram hruaituten han thlur bing sela. Leileta siam theih la siam puitlin loh hi leileta siam thuai ni se la. Chumi rual chuan leilet hmin tawh cheibawl ngai te hi hlawk zawka buh a thar theih nan khawih tel ve ni se. Tun atanga kum tam vak lo chhung hian BUH-ah kan intodelh ang a, Ration dawrah Zo BUHFAI ngei kan lei theih a beisei awm hle a ni. Kan buh tharin min daih lo a nih pawhin lei belh ngai a tam vak lo vang.